Sin terren talian en la vischinanza da l'Engiadina Bassa ha la terra stremblì mardi la damaun cun ina fermezza da var 3,8 sin la scala da Richter, scriva l'agentura da novitads Keystone-SDA. Quest terratrembel saja probabel vegnì sentì en parts da la Svizra, communitgescha il Servetsch svizzer da terratrembels da l'ETH da Turitg (SED). Il terratrembel saja capità a las 9:49 circa 16 kilometers en il sidost da Strada en Engiadina, ha il SED scrit sin sia pagina d'internet.
Donns na sajan per regla betg da spetgar en cas d'in terratrembel da questa fermezza. Da la Svizra èn entradas entaifer in'ura fin 50 annunzias da quest terratrembel tar il SED, numerus da Scuol.
Ils terratrembels en Grischun derivian da las plattas continentalas da l'Europa e da l'Africa che collideschan sut las Alps, declera Michèle Marti dal SED envers RTR. Tar ils moviments da las plattas datti tensiuns e cur che quellas sa statgan chaschuna quai terratrembels. Sco en quest cas saja normal ch'i dettia ina sequenza dad in terratrembel principal, suandà da pliras stremblidas pli flaivlas. En Grischun strembla la terra pli savens ch'en la Bassa, ma prognostitgar in terratrembel na saja anc adina betg pussaivel.
