Per cumenzar il 47avel tavulin a Puntraschigna en l'hotel Sunstar, ha Luzius Stricker da l’Uffizi chantunal per economia e turissem, preschantà curt il studi davart la valur dal turissem. Quai cun il focus sin l’Engiadin’Ota.
Cun il turissem da Puntraschigna vai bain – però...
Las cifras per la regiun turistica d’Engiadina muassan il suandant: 918 milliuns francs creaziun da valur dal turissem e quai cun 4,3 milliuns pernottaziuns turisticas. Questas cifras fetschian bain d'udir, quai di il directur dal turissem da Puntraschigna Ursin Maissen. Ed i saja er bel d'avair las cifras nair sin alv.
Bler savevan nus gia, ma igl è bel d'avair quellas cifras nair sin alv sco la situaziun è. Nus vesain quant bain ch'i va cun nus, però era che nus stuain restar londervi.
Malgrà il plaschair da la situaziun actuala stoppian ins er adina savair che tut possia sa midar. Ins na sappia betg co ch’il mund guarda ora en l'avegnir, uschia ch'Ursin Maissen vul er esser preparar sch'insatge sa mida.
... i dat chaussas da discutar
A la discussiun èn er problems da la branscha turistica stads in tema. Uschia per exempel ils problems da recrutaziun, la difficultad da chattar alloschis pel persunal d'hotels ed u er il spazi d'abitar per indigenas ed indigens. Il problem cun chattar suttetg per il persunal enconuscha er la co-directura dal hotel Sunstar a Puntraschigna, Noëmi Ruckstuhl.
Per nus èsi schont pesant, da chattar alloschis per noss persunal. E sche quai funcziuna essan nus però betg adina cuntents cun la qualitad dals alloschis.
Fin uss, saja il chattar persunal betg stà in grond problem per l'hotel Sunstar Puntraschigna, di la co-directura Noëmie Ruckstuhl. Ses hotel haja tschernì aposta ina ierarchia platta, vul dir pli pauca glieud da cader, però dapli incumbensas ed in dretg da cogestiun per il persunal.
En diesch onns han forsa dapli hotels ina structura d’administraziun pli platta e pli simpla sco nus. A mai para, ch'il persunal en il turissem duai e vul era sa participar dapli en l'affar.
Per Puntraschigna è il mix interessant
Da campadis fin ad hotels da tschintg stailas - Puntraschigna porscha gia oz ina gronda variaziun en il turissem. Quai saja era vinavant giavischà, di il directur dal turissem da Puntraschigna Ursin Maissen. Cun in mix d'innovaziun ed alloschis classics, duai Puntraschigna er vinavant porscher bler per ils giasts che vegnan en la vischnanca.