Suenter ch'in studi ha scuvert abus en la Baselgia catolica, ha era la Procura publica dal Grischun investigà.
Suenter investigaziuns da passa dus onns ha la Procura publica dal Grischun decis da serrar il cas d'in spiritual da la claustra da Müstair. La raschun: Tschertas accusaziuns sajan surannadas, tar autras na saja il tatg betg accumplì. Tuttina n’è la decisiun anc betg definitiva, damai ch’in recurs pudess anc vegnir fatg.
Inquisiziun canonica: In process senza fin previsibla
Gia l’atun passà è la baselgia vegnida crititgada per sia gestiun dal cas. Malgrà ch'i ha dat mesiras preventivas e ch'il radius d’acziun dal spiritual è vegnì restrenschì, na saja betg vegnì controllà avunda tge ch'el fa. Observaders renfatschan a la baselgia da betg agir cun avunda consequenza e da reglar cas d'abus en l'intern. Cunter questas s'ha l'uvestgieu defendì.
Malgrà la decisiun da la procura publica cuntinuescha la baselgia cun sia inquisiziun tenor dretg ecclesiastic. L'uvestg Joseph Maria Bonnemain ha instradà immediatamain las mesiras necessarias per survegnir access a las actas dal cas. Las mesiras preventivas cunter il spiritual restan per il mument en vigur.
Dapli dumondas che respostas
Il cas resta cumplex e senza ina fin immediata en vista. Cler è be che la situaziun actuala na vegn a cuntentar nagin. Il cas n'è betg sclerì, l'inquisiziun canonica dura. L'uvestg Bonnemain ch'è la persunalitad svizra en il cumbat cunter l'abus resta sez confruntà cun il tema en ses agen uvestgieu. Il spiritual resta en ils egls da la publicitad dubius. E l'unfrenda resta enavos cun la valitaziun ch'ils delicts èn surannads u betg acts chastiabels.
La dumonda sch’i vegn fatg recurs cunter la decisiun da la procura publica è al mument da la publicaziun da quest artitgel anc averta.