Avant diesch dis ha la gasetta NZZ rapportà d'in spiritual en la Val Müstair ch'ha malgrà scumond fatg ceremonias publicas ordaifer la claustra. Ussa mussan ulteriuras retschertgas da RTR ch'el ha fatg quai almain en tschintg cas e quai cun la lubientscha da l'uvestgieu da Cuira. RTR ha discurrì davart questa pratica cun l'uvestg da Cuira Joseph Maria Bonnemain.
RTR: Signur Bonnemain dapi dus onns investighescha la procura publica cunter in spiritual en Val Müstair – durant quest temp valan cundiziuns spezialas per el. Tge cundiziuns èn quai?
Nus avain prendì mesiras da precauziun. Quellas vesan or uschia che quest prer dastga be esser activ en sia funcziun aifer la claustra da Müstair.
En almain tschintg cas ha il reverenda dentant survegnì ina permissiun speziala, savevas Vus da quai?
Jau saveva da quai, perquai ch'el ha mintgamai dumandà il vicari general responsabel. Cun el sun jau di per di en barat. Nus persequitain la situaziun a Müstair ed jau sun vegnì infurmà.
Vus avais ditg a mai, il vicari general ha dà questas lubientschas spezialas, tge èn stads ils motivs?
Igl èn adina stadas situaziuns spezialas che nus avain examinà da moda conscienziusa. Nus avain tschentà la dumonda, sch'i exista in privel, sch'el lavura en questa situaziun e sche la glieud sa senta bain. E suenter avair considerà quai essan nus vegnids a la conclusiun ch'ins po far talas excepziuns.
Vus essas pia da l'avis ch'ins haja fatg tut endretg e ch'ins haja pudì dar questa libertad al spiritual, per il qual ch'i vala la presumziun d'innocenza?
Natiralmain pon ins adina far meglier insatge, pretender insatge auter fiss arrogant. Ma jau poss garantir a Vus: jau emprov da surpigliar mia responsabladad sco uvestg. Nus persequitain questa situaziun dapi dus onns e nus empruvain da far mintga giada il dretg cun responsabladad.
I dat auters uvestgieus che han in'autra pratica. Els han ina sort lavurers socials ch'accumpognan e controlleschan spirituals dispitaivels. Pertge na vegn quai betg fatg?
Ina tala surveglianza è ina mesira ch'ins prenda pir a la fin d'in process, betg a l'entschatta d'ina examinaziun preliminara en la baselgia.
Ma en ina situaziun uschè delicata u heiclia fissi però pussaivel da far quai. I na fiss er betg scumandà da far dapli en quest cas?
Sin fundament da quai che l'artitgel da la NZZ ha mess en moviment, sun jau vid ponderar co agir correctamain. Jau vegn a discurrer proximamain cun il spiritual ed anc ina giada empruvar dad ir enturn meglier cun la situaziun.
Per il spiritual vala la presumziun d'innocenza.
