AULA S-chanf - Emprender co reagir en situaziuns d’urgenza

Dapi 43 onns datti il champ da scolaziun per salvament ed emprim agid. Sur 20 onns è il «Ausbildungslager» ubain curt AULA gia situà en la caserna a S-chanf. Qua emprendan ils radund 340 giuvenils co dar emprim agid, stizzar in fieu ed er co far in salvament.

Scolaziuns per la vita

Las participantas ed ils participants da l'AULA emprendan er d'enconuscher in zic la vita en il militar. Levar curt suenter las 6, far pront per il di e lura dar tut fin la saira. Quai è era part da l'AULA.

Per Ramona Okle èsi mintg'onn bel da pudair turnar a S-chanf.

Er per Benjamin Huber, che fa part a l'AULA dapi trais onns, èsi bel da vegnir mintga stad a S-chanf. Uschia possian ins puspè esser per in'emna ensemen cun amis ed amias dals onns passads. «Nagliur auter pon ins far in sgol cun helicopter, emprender bler che gida er en la vita da mintgadi. Quai è bellischem.» Sco ils blers participants e las bleras participantas emprova er el da prender part mintg'onn a l'AULA.

Organisaziun da l'AULA

Jakob Bähler è sco manader dal champ responsabel per ils radund 340 giuvenils e giuvenilas. Senza agid d'organisaziuns d'urgenza sco ils pumpiers, la REGA, l'armada ma era da la Crusch Cotschna Svizra – na fiss quest champ betg pussaivel.

Il pli impurtant però sajan ils circa 140 voluntaris e voluntarias, ch'instrueschan e guardan dal bainstar dals giuvens e da las giuvnas. La gronda part dals voluntaris fa gia daditg part dal team, di Bähler.

En l'avegnir duai l'AULA crescher. Las scolaziuns vegnian per il mument fatgas en tudestg e franzos. A partir da l'auter onn duai er vegnir instruì en talian.

Impressiuns da l'AULA