Sch’il di da skis da bellezza vegn interrut abrupt d’in accident, vegn en acziun il salvament da pista, SOS. Las patrugliadras e patrugliaders èn responsabels da prestar emprim agid e da transportar ils pazients e pazientas davent da la pista.
Sch’ins po gidar ad insatgi u sch’ins po levgiar las dolurs fa quai plaschair.
La lavur dals patrugliaders na finescha dentant betg a l'ur da la pista. Els surdattan las pazientas e pazients u al helicopter u van a val cun els e surdattan els a l'ambulanza. En il territori da skis Motta Naluns a Scuol èn mintgamai sis patrugliaders e patrugliadras sin pichet e pronts per cas urgents. Accidents grevs datti en media 250 per onn.
-
Bild 1 von 5. La damaun vegn preparà il canadais. Bildquelle: RTR.
-
Bild 2 von 5. Il canadais vegn transportà cun sutgera al post dals patrugliaders. Bildquelle: RTR.
-
Bild 3 von 5. Sin pista vegn fatg emprim agid ed evaluà la blessura. Bildquelle: RTR.
-
Bild 4 von 5. Sch'i va vegn il pazient u la pazienta transportada cun il canadais, uschiglio vegn clamà il helicopter. Bildquelle: RTR.
-
Bild 5 von 5. A la staziun da val spetga gia l'ambulanza – il patrugliader è liber per il proxim cas. Bildquelle: RTR.
Vast champ d’incumbensas
Da gidar tar accidents è però be ina part da las incumbensas dals patrugliaders. Els èn er responsabels per la segirezza sin las pistas ed er per las lavinas.
Igl è ina gronda responsabladad. Nus faschain tut il pussaivel per la segirezza, ma a la fin ha er mintga skiunz in’atgna responsabladad.
Ed era sche mo radund 30 dals 70 kilometers da pista èn averts, na munta quai betg exnum pli pauca lavur per els, declera Curdin Egler. La glieud sa concentreschia sin las pistas avertas, entras quai haja là dapli travasch.
Ils patrugliaders èn mintga bun'ura ils emprims sin pista – per controllar tut las marcaziuns e che la segirezza sin mintga singula pista è dada.