Uss en la pensiun ha l'anteriur magister, Daniel Badraun, dapli temp per scriver. Quai è gia daditg sia passiun ed uss po el sa deditgar plainamain a sias istorgias. «Da pudair scriver, quai ma dat satisfacziun. Era sch'i fiss mintgatant bel da far insatge auter. Ma sch'ins legia lura il resultat da la lavur – ed il text è bun – fa quai cuntent. Perquai scriv jau.»
Chattar ideas ed inspiraziun
Il scriptur è creschì si a Samedan ed ha fatg las scolaziuns da magister a Cuira. Pli tard è el ì a star dasper Schaffusa ed ha là dà scola fin la pensiun. Durant tut il temp ha Daniel Badraun adina scrit sias istorgias. Il resultat èn numerus romans, crimis, cudeschs d’uffants ed era tocs da teater.
Da tut quel stgazi d'experientscha po Daniel Badraun er uss profitar. Sch'el dovra ina idea, po el returnar a ses texts vegls e implementar quellas ideas en las novas istorgias.
Jau hai dapli ideas che quai che jau dumogn da scriver si.
Sias ideas ed inspiraziuns prenda el da diversas funtaunas. Per exempel, sch'el va a spass, lura vesa el in nov lieu u observa la natira ed uschia vegnan era novas ideas endament. Ma da l’idea al manuscrit publitgà è quai anc ina lunga via.
Las sfidas da publitgar en rumantsch
Per Daniel Badraun èsi stà pli simpel da publitgar en tudestg. Quai perquai ch'ins haja dapli pussibilitads da publitgar, cun quai ch'i dettia dapli chasas edituras.
Tenor il scriptur giajan ins tar ina chasa editura cun ina idea per in cudesch e sche quella idea plaschia era a la chasa editura, suttascrivian ins in contract.
Per il rumantsch però, na bastia quai betg. Qua èn las pussibilitads da publitgar pli raras. Perquai stoppian ins avair in project fitg avanzà ubain gia in manuscrit.
I dat dapertut il ristg ch'ils texts finids na vegnian betg publitgads. Mintgatant poss jau però duvrar parts da quels per auters manuscrits.
I saja però era bain pussaivel ch'ins legia ils texts refusads ed ins badia che quellas n'eran propi betg buns, uschia Badraun.
Cun experientscha vegnian er ils texts megliers
Uschia pon ins era vegnir a frida sch'in text vegnia ina giada refusà. Ed exact quels muments, sajan experientschas, che fetschian vegnir meglras sias ovras: «Ins po forsa schon dir che l’ultim cudesch è il meglier.»
Per Daniel Badraun è ses ultim cudesch pia la meglra creaziun. Quest atun cumpara il crimi cun il num «Die tote Tante in der Limmat» che Daniel Badraun ha scrit ensemen cun l’autur Marcus Richmann. El sa legra che la glieud po leger sia nova ovra.
