Las stizuns da cudeschs a Cuira Lüthy, Schuler Bücher ed Orell Füssli faschevan la fin d'emna passada bunamain la parita d'esser in zic in lieu da refugi da la plievgia e l'aura scardalida. Era ils pitschens cafés ch'èn integrads en duas da las stizuns paran d'attrair la glieud. Las paraids e las maisas plain cudeschs cun titels captivants e cuvertas da colur fan gust da sfundrar en in auter mund.
-
Bild 1 von 2. En la filiala da Schuler Orell Füssli a la staziun da tren a Cuira. Bildquelle: RTR.
-
Bild 2 von 2. La stizun da cudeschs Lüthy porscha rodund 35'000 cudeschs sin ina gronda surfatscha. Bildquelle: RTR.
Sfundrar en in auter mund quai saja tschertgà, di Christiane Dumrath la manadra da la filiala fusiunada Schuler ed Orell Füssli en il sutpassadi da la staziun dal tren a Cuira:
En temps da malsegirtads mundialas tschertgan bleras persunas bunas istorgias per pudair sa profundar e sa distatgar dals quitads.
E quai po era Jenny Soldano suttascriver. Ella lavura dapi l'avertura il 2019 en la filiala Lüthy che sa chatta en l'edifizi Steinbock en il center da Cuira. Da malaura prendia la clientella per part pli patgific e restia pli ditg en la stizun. Saja quai per laschar cussegliar u era per baiver in café. Ch'els hajan dentant bler dapli glieud durant ils dis da malaura, gliez na possia ella betg dir:
Era durant dis da bell'aura è la butia mintgatant fitg plaina e nus sa dumandain lura daco che la glieud n'è betg insanua ora en la natira.
Ina pitschna differenza percorscha la stizun Schuler Bücher che sa chatta dapi questa primavaira en in lieu pli central en la via da la staziun, gest sper il café Merz. Durant il zercladur cun blers dis da sulegl ed autas temperaturas hajan els fatg pli pauc svieuta che durant il mais da fanadur, di la manadra da filiala Martina Tonidandel.
Jau sun vegnì qua perquai ch'jau hai gì lungurus ed stizuns da cudeschs en in lieu nua ch'jau poss vegnir a ruaus.
Sfegliar e cumprar cudeschs n'è pia betg mo in'activitad da malaura. Tuttina in sguard en las stizuns da cudeschs ed era en las tastgas da cumpra mussa ch'i po senz'auter esser in bun passatemp sch'i fa mal'aura giuadora.
In zic inspiraziun porta la marella