Il CB Schlarigna – fundà l'onn 1950 – festivescha ses 75avel anniversari. Quai ch'ha cumenzà cun ina pitschna gruppa d'umens passiunads dal ballape è sa sviluppà sur ils decennis ad in club ch' ha cuntanschì success e mantegnì l'entusiassem per il sport.
Emprims success
La fundaziun dal FC Celerina è stada in pass curaschus da 15 umens cun la visiun d'in club da ballape en l'Engiadina. Gia l'emprim onn suenter la fundaziun è il club daventà commember da la Federaziun svizra da ballape ed ha pudì registrar emprims success en la cuppa grischuna. Ma il CB Schlarigna ha era stuì surmuntar numerusas sfidas durant ils onns, tranter auter las cundiziuns climaticas ch'han difficultà il trenament or en il liber.
Attracziun per clubs professiunals
Malgrà las sfidas èsi reussì al CB Schlarigna da meglierar sia infrastructura e da s'etablir sco in lieu attractiv per trenaments. Numerus clubs professiunals – tranter auter era la squadra naziunala svizra e teams internaziunals – han profità da las cundiziuns excellentas per champs da trenament.
Per il 75avel anniversari dal club vegn organisada ina gronda festa sin la plazza da ballape San Gian cun acts sportivs ed era concerts.