A la davosa radunanza generala, ch'ha gi lieu il matg, ha il cussegl administrativ preschentà divers scenaris per segirar il futur da la bieraria Tschlin SA, fundada avant 20 onns.
Mantegnair, collavurar u vender?
Ad ina radunanza d’infurmaziun han ils responsabels ussa preschentà lur tensiun per segirar in avegnir. Mantegnair per tut pretsch è il cler credo. Surdar la producziun ad ina firma externa na vegnia betg ad esser in’opziun. Ins prevesia percunter da collavurar anc pli stretg cun la firma «Chopfab», ina firma ch'è en possess da la firma Locher en il chantun Appenzell. Da vender la bieraria Tschlin SA na saja actualmain nagin'opziun.
Sepulir n'è nagin tema. L'onn current daventa bun, ma nus stuain renovar ils implants da producziun vegls.
Dapi dus onns vegn la biera da Tschlin gia embuttigliada da la firma «Chopfab». Novas tractativas duain manar ad ina schliaziun per mantegnair la producziun en l'Engiadina. Las tractativas cun la firma Locher n'han dentant anc betg gì lieu.
Ina societad da promoziun
Ils responsabels han infurmà da vulair fundar ina societad cul num «amis da la bieraria». Cun quella societad prevesian ins da generar radund 75’000 francs ad onn. Ils raps duain vegnir duvrads per rinforzar la reclama e surmuntar la situaziun finanziala che sa preschenta actualmain, cun in deficit da radund 110’000 francs l'onn 2024.
Ord l'archiv
La Bieraria Tschlin a Martina producescha biera 100% biologica. Ensemen cun partenaris da la Val Müstair u da la Val Puschlav produceschan els diversas bieras regiunalas. Il 2020 ha RTR realisà ina pitschna seria davart la bieraria Tschlin: