«Bütscha la ritscha» - Success l'emprim di da pestga a l'En a S-chanf

Il prim da matg cumenza la stagiun da pestga en il Grischun. Per blera glieud è la pestga in hobi che vegn fatg cun corp ed olma. Gia avant la levada dal sulegl sa preparan las pestgadras ed ils pestgaders ed èn lura da vesair cun lur pertgas a l'ur dad auas en l'entir chantun.

A S-chanf datti in «hotspot» per l'emprim di

Gist dador la vischnanca da S-chanf en Engiadin'Ota ramassan las ovras electricas d’Engiadina aua per lur mir da serra. Circa 200 meters avant quest mir da rimnada d’aua sa calma la sveltezza dal flum. In lieu ch'è quasi perfetg per pestgar. E qua èn sa radunads l'emprim di da pestga ils pestgaders da las vischnancas cunfinantas. RTR accumpogna inqual dad els tar l'emprima bagnada da verms da l’onn. Tranter auter il pestgader Robert Luzi ch'ha spetgà cun brama sin l'emprim di da pestga. En sia famiglia saja la pestga ina tradiziun ed in zic en il sang.

Anc sajan cunzunt denturn peschs pitschens. Uschia ch'i vala d'esser pazient quest emprim di da pestga. Sper ils pestgaders cun experientscha è er il giuven da 15 onns Silvano a la riva da l'En. El emprova sia fortuna avant ch'el ha dad ir a scola. Malgrà che Silvano ha stuì vegnir baud ord las plimas fa el quai gugent cunquai che la pestga plascha uschè bain. El va dapi quatter onns, al cumenzament cun ses bab ed uss po el er ir persul.

I dovra dapli pazienza

Il plaschair d'ir a petga è anc adina grond tar Robert Luzi che va gia dapi decennis. El giauda la bella cuntrada, il far dis e la quietezza la bun'ura baud sper l'aua. Quai che saja main bel è il svilup dals peschs. Cunquai ch'igl ha adina pli paucs peschs en ils lais, flums ed auals saja il tschiffar peschs er adina ina pli gronda sfida, quai che na motiveschia er betg exnum la generaziun giuvna da persequitar il hobi da la pestga.

Las cifras da l'Uffizi chantunal da chatscha e pestga discurran ina lingua clera. Dapi il 2002 è il dumber da peschs tschiffads ì enavos d'in cuntin. Cun 59'116 peschs pestgads il 2024 è il dumber uschè bass sco anc mai ils ultims 22 onns. Cumpareglià cun l'onn avant èn vegnids tschiffads en il Grischun radund 4000 peschs damain, quai è in minus da 6%. La digren è cunzunt da constatar en las auas currentas (-17%), en ils lais hai schizunt dà in augment (+4%) da peschs tschiffads cumpareglià cun il 2023.

Digren da peschs er en il Rain

Ils Cuntrasts tematiseschan la sanadad dal Rain che curra tras la Surselva. Er qua sa diminuescha il dumber da peschs d'in cuntin.