Siglir tar il cuntegn

Header

video
Erich Schoch ha purtà plant cunter la vischnanca
Or da Telesguard dals 15.04.2020.
laschar ir. Durada: 4 minutas 23 Secundas.
cuntegn

Cas S-chanf Erich Schoch s’exprima en chaussa

Erich Schoch è stà in grond client da la Resgia da S-chanf. Dapi l'onn 2014 ha el adina puspè empustà laina per construir chasas en lain en il chantun Appenzell. Vegnì stut è Schoch, cura ch'el è vegnì dumandà il november 2017, sch'el na pudess betg pajar la laina furnida pir l'onn proxim, pia il 2018. Quai ha sveglià suspects ed intimà l’affarist da far retschertgas. Il resultat ha mussà, ch’in terz da la laina empustada n’era betg arrivada fin al lieu destinà.

L’affarist appenzellais sa regorda anc bain vid l’emprim contact via telefon cun il manader da gestiun da la Resgia. Quai per confruntar el cun ils resultats da sia retschertga. La resposta n’emblida Erich Schoch betg.

Che jau n’haja betg da vegnir uss cun quest, che questa istorgia saja gia surannada.
Autur: Erich Schoch manader da construcziun, Appenzell

L’advocata dal selvicultur, Claudia Nievergelt, snega sin dumonda da RTR categoricamain la pretaisa dad Erich Schoch.

audio
Cas S-chanf: Erich Schoch ha purtà plant cunter vischnanca
ord Novitads dals 15.04.2020.
laschar ir. Durada: 3 minutas 21 Secundas.

Trais mesiras

Cunquai che la vischnanca da S-chanf n’ha betg reagì, ha l’interpresa Schoch en il fratemp inoltrà ed instradà trais pass giuridics en chaussa:

  • Plant cunter nunenconuschent
  • Scussiun dad 1 milliun francs cunter vischnanca da S-chanf
  • Serrada dal register funsil per chasa dal selvicultur (Grundbuchsperre)

Erich Schoch è persvadì che sia firma n’è betg l'unica ch'è vegnida donnegiada. Ed el fiss fitg stut, sch’i na vegniss betg ad ina sentenzia. Quai surtut suenter ils resultats dal rapport d’examinaziun extern che la vischnanca da S-chanf ha laschà far.

«Capità avant mes temp»

Il president communal da S-chanf, Riet Campell, suttastritga che tut las renfatschas envers la vischnanca e la Resgia pertutgian il temp avant ses presidi. Quel ha cumenzà il prim da schaner 2020. Perquai na possia el era betg dir bler en chaussa. La suprastanza actuala haja surdà a la procura publica tut ils documents.

Nus collavurain cun la procura publica e la sustegnain cumplainamain tar las inquisiziuns.
Autur: Riet Campell president communal, S-chanf

Riet Campell haja er dubis, sche la vischnanca ha propi subì in donn finanzial u betg, uschia il president communal envers RTR.

video
L'intervista cun Riet Campell
Or da Telesguard dals 15.04.2020.
laschar ir. Durada: 2 minutas 2 Secundas.

L’inquisiziun penala da la procura publica è pendenta. Tenor il procuratur public directiv, Maurus Eckert, saja la procura publica gia vidlonder dapi passa dus onns. Cura ch'il cas vegnia serrà giu, na saja entant anc betg cler. I vala anc adina la presumziun d’innocenza per tut ils involvids.

RTR actualitad 17:00

Artitgels legids il pli savens