Siglir tar il cuntegn

Header

video
S-chanf: Populaziun vul transparenza e rapport mussa irregularitads
Or da Telesguard dals 03.04.2020.
laschar ir
cuntegn

S-chanf Return dal selvicultur dispensà sveglia dumondas

Che S-chanf cuntinuescha la collavuraziun cun il selvicultur dispensà procura per segns da dumonda. Sper la petiziun lantschada da la populaziun da S-chanf che pretenda dapli transparenza en il cas è RTR uss en possess dal rapport ch'è atgnamain betg accessibel per la publicitad.

Il rapport da 15 paginas è brisant. Tenor ils experts che han scrit il rapport hai dà numerusas irregularitads tar la gestiun forestala e tar l’andament da la vischnanca da S-chanf. Uschia è vegnì constatà che durant ils onns 2014 – 2018 manchian tranter auter divers documents da furniziun ed er quints uffizials.

Fin tar il quint annual da l’onn 2018 n’èn betg tut ils posts da bilantscha vegnids documentads en la bilantscha.....[Selvicultur] ha retratg divers pajaments contants da clients che n’èn betg figurads en il cudesch da cassa.....
extract dal rapport d'examinaziun

Er affars sur cunfin èn tenor il rapport betg vegnids manads tras da moda correcta.

….Per tut ils exports mancan ils documents da furniziun ed ils quints uffizials tar l’administraziun communala....Las entradas da quests pajaments n’han betg pudì vegnir attestadas.
extract dal rapport d'examinaziun administrativ

Ultra da quai menziuna il rapport affars privats tranter il selvicultur e la vischnanca sco er decisiuns a favur dal selvicultur. Perquai vegnan ils experts a la conclusiun suandanta:

Sin fundament da l’examinaziun administrativa avain nus constatà numerus sbagls en la direcziun administrativa e l'andament da la vischnanca da S-chanf. En divers process centrals (manipulaziun da la cassa, cumpensaziun da prestaziuns internas, process da facturaziun en la Resgia, gestiun da l’inventar) manca ina documentaziun interna e controllas adequatas, las qualas vessan evità sbagls ubain laschà scuvrir els...Finalmain è la dumonda per nus schebain las persunas incumbensadas cun las revisiuns externas hajan pratitgà lur mandat confurm a la lescha e cun la premura necessaria ed usitada en la branscha.
extract dal rapport d'examinaziun administrativ

Il president communal da S-chanf, Riet Campell, n’ha betg vulì prender posiziun en chaussa.

Dentant pretenda la populaziun da S-chanf ina communicaziun averta. Perquai han ils abitants lantschà ina petiziun che pretenda dapli transparenza en il cas.

RTR novitads 17:00

Artitgels legids il pli savens

Scrollar a sanestra Scrollar a dretga