Chapella Open Air - In comeback suenter nov onns

Per la 44avla ediziun dal pli vegl open air dal Grischun a Chapella en l’Engiadin’Ota, han ins pudì tadlar la band indigena «Cervoholics». Quai suenter nov onns ch’els n'han betg fatg concerts. Dapi bunamain 30 onns èn ils commembers vi da far musica.

Vul dir: Martin Clalüna sco ghitarrist e Christian Moggi sco battarist èn da la partida d'emprim ennà. Sur 20 onns è er il bassist Rico Puorger vi da far musica en la band.

Ma dapi in onn e mez han ils Cervoholics chattà in chantadur: Gilbert Reber. Ed uss è stad ed il temp è qua da sa mussar sin in palc.

Tuttina star sin il palc

Il motto dal Chapella Open Air da quest onn è stà «Zäme im Engadin». E sco Larissa Wingeyer dal comité d’organisaziun ha ditg saja la finamira da puspè attrair la glieud da l’Engiadina per vegnir a Chapella dasper S-chanf.

Tenor ella èn ils visitaders e las visitadras vegnidas ils ultims onns adina pli pauc. Perquai hajan ins quest onn cumpartì gratuitamain entradas per l’open air. E per far vegnir dapli glieud indigena a Chapella sajan ils Cervoholics sco band indigena era perfetgs. E quels han pudì dar il concert il venderdi saira.

Impressiuns dal Chapella Open Air