La nova ordinaziun naziunala da la lescha da chatscha, che vala dapi il favrer da quest onn, lubescha la surdina er per la chatscha grischuna. Las opiniuns tar chatschadras e chatschaders van però in ord l’auter.
Ils ins èn persvadids che la surdina schanegia l’udida ed il tregant u la treganta daventa pli segira perquai ch’i dat in pli pitschen cuntraculp. Per auters va la tradiziun da la chatscha grischuna pervia adina dapli meds tecnics pli e pli a perder.
Ferrer d’arma profita
Il ferrer d’armas Andri Tomaschett è cuntent cun la nova ordinaziun. L’interess per la surdina saja gronda tar chatschadras e chatschaders ed el haja pia blera lavur da montascha. Er per el haja la surdina blers avantags, ins stoppia però er savair ch’il schluppet daventa per var 400 grams pli grev e la channa per in pèr centimeters pli lunga.
Dumonda finanziala
Per cumprar ina surdina dovri ina lubientscha da la polizia. Cun montascha vegn ina tala a custar passa 1’000 francs. Per divers chatschaders è la decisiun da cumprar ina surdina u betg pia er ina dumonda finanziala.
