Reveder la lescha da chatscha chantunala? Quai na va betg dad oz sin damaun. I saja in process politic fitg intensiv che less pazienza, di Adrian Arquint, co-manader da l’Uffizi da chatscha e pestga dal Grischun. Sco pli emprim dovri ina valitaziun dals puncts che fan senn da midar, uschè lunsch na sajan els dentant anc betg.
Puncts da discussiun
Puncts da discussiun dettia inquals. Per exempel: La dumonda dal caliber da 7mm ubain era il temp da chatscha. In’auter punct è la chatscha sin las gaglignas e lieurs da naiv che pertutga la chatscha bassa. Quella chatscha ha ellas davosas emnas procurà per lingias grassas el chantun Uri, nua che l’iniziativa da salvar las lieurs e las gaglignas da naiv è piz a cup – cun 52% – na betg vegnida acceptada.
Quest resultat ha era manà tar discussiuns el Grischun. Qua è la chatscha sin quels animals – sper il chantun Uri ed il chantun Valais – medemamain lubida. Quai saja bun uschia, manegia Adrian Arquint.
Ins duess chalar cun la chatscha lura cura ch’ins vesa ina influenza negativa sin ils effectivs. En il Grischun avain nus ina gronda surfatscha ed in ambient fitg ideal per quels animals. Perquai è il dumber stabil.
Era sche la chatscha sin quels animals è anc stabila, tenor Adrian Arquint vegniss era quella discutada tar ina revisiun da la lescha da chatscha.
Anc n'è betg cler cura che la revisiun vegn a succeder
Cura exact che quella revisiun vegn a succeder, quai stat anc en las stailas. Ils proxims onns na saja betg da quintar cun ina revisiun. Sche en 5 ubain forsa schizunt en 10 onns, quai n'ha Adrian Arquint betg vulì tradir. Ina chaussa è dentant clera: cura ch’igl è uschè lunsch giavischia el ina revisiun che vegn discussiunada en il rom dal fatg e betg memia politic.