Be singuls autos passan il cunfin, oravant tut cunfinaris che vegnan a lavurar en Svizra. En l’autra direcziun datti anc damain traffic, quasi nagins Svizzers passan il mument la duana giusum la Bregaglia en direcziun Chiavenna.
Las guardias da cunfin ferman ils automobilists ch'arrivan da l’Italia, ma interessantamain n'è quai betg il cas cun las guardias da cunfin talianas. Vairamain stuessan quels laschar passar mo ils cunfinaris che han ina conferma per lavurar en Svizra, ma questa controlla na para betg da funcziunar il mument.
La bun’ura avant il temp da lavur datti in zichel traffic, ma lura vegni extrem quiet. La bloccada ordinada da l’Italia para da far grond effect sin la regiun da cunfin.
RTR actualitad 08:00
