Dapi la fusiun dal 2014 vegn manada la vischnanca da Scuol dad in cussegl communal, tenor il president communal Christian Fanzun in model ch'è sa verifitgà.
Bleras dumondas a la davosa radunanza
Radund 140 abitantas ed abitants han prendì part a la radunanza l’entschatta mars. Differents abitants han crititgà la vischnanca da betg infurmar en detagl davart projects previs – e da betg infurmar en detagl davart la finanziaziun.
Sin quai ha la Partida liberaldemocratica da la Regiun Engiadina Bassa Val Müstair inoltrà ina dumonda tar la vischnanca, da ponderar il model politic. Vitiers è era entrada ina petiziun.
Tenor il president communal Christian Fanzun è sa verifitgà il model dal cussegl communal fitg bain, ma dapi la pandemia da corona datti adina dapli cuntravent. Perquai prevesan els ussa da reponderar il model politic. En differentas sesidas ensemen cun il cussegl communal, cun la direcziun e cun perits externs – vulan els uss examinar la situaziun e proponer a la populaziun adattaziuns u forsa perfin in midament sin in model da parlament.