Siglir tar il cuntegn

Header

Video
S-chanf: Duri Campell, anteriur president communal sa defenda
Or da Telesguard dals 16.10.2019.
laschar ir
cuntegn

Duri Campell prenda posiziun «Dubius che tut capita uss»

L'anteriur president communal da S-chanf Duri Campell n'haja en ses temp al timun da la vischnanca constatà naginas irregularitads u problems da persunal en il menaschi forestal.

Gist ils davos dus onns che Duri Campell è stà president communal da S-chanf vegnan uss controllads d'in biro spezialisà. I saja dubius che tut quai capitia uss, uschia Duri Campell vers RTR. Ils onns 2015 e 2016 sajan stads buns onns per la gestiun forestala ed er per la Resgia da S-chanf. Sch'el avess constatà irregularitads, lura fiss el intervegnì.

Grondas libertads

Il selvicultur dispensà aveva, tenor Duri Campell, ina gronda responsabladad, ma era ina gronda libertad. In infurmant, enconuschent ad RTR ha raquintà: «Jau ed era auters collavuraturs da quella giada avevan pliras giadas confruntà l’administraziun communala ed era Duri Campell cun la moda e maniera co ch'il selvicultur ès ì enturn cun ils collavuraturs». Duri Campell è dentant surstà da quellas reproschas. Durant ils sis onns ch'el è sta president n'haja nagin lamentà e rapportà da tals problems, ni tar el ni tar il chanzlist u responsabels dal departament.

Ina lavur fitg curiusa

Plinavant è Campell er surstà ch'i vegnia be discurrì dals onns 2015 e 2016 – ils ultims dus onns ch'el saja stà en uffizi. Per el haja il president communal actual fatg ina lavur fitg «curiusa». Gian Fadri Largiadèr da sia vart n'è betg stà cuntanschibel per telefon. Per e-mail ha la vischnanca communitgà che la suprastanza sco er il president communal na dettian naginas infurmaziuns areguard quest cas.

La polizia chantunala fa il mument in'inquisiziun, sch’igl haja dà ils onns 2015 e 2016 affars illegals cun laina. L’emna passada ha la vischnanca communitgà d’avair dispensà il selvicultur. I vala la presumziun d'innocenza.

RR actualitad 17:00