Cun Silvaplauna, Madulain e Zuoz han gist trais vischnancas ditg Na a la cunvegna da prestaziun per ils onns 2026/2027 – cun ina finanziaziun transitorica da 50,8 milliuns francs.
Entras questa decisiun vegn la Fundaziun provediment da sanadad Engiadin'Ota ad esser insolventa entaifer curt temp, pli probabel la primavaira. Il cussegl da fundaziun instradescha in moratori, quel era gia vegnì preparà avant la votaziun, pervi dal resultat intschert.
Mo sche tut las 11 vischnancas da l'Engiadin'Ota avessan ditg Gea, avess la cunvegna pudì vegnir realisada.
In Na da Zuoz, Madulain e Silvaplauna
Ils 4 da november han dentant Zuoz, Madulain e Silvaplauna ditg Na. La cunvegna è cunquai giud maisa. La Fundaziun provediment da sanadad Engiadin'Ota vegn tras quai ad esser insolventa entaifer curt temp, pli probabel la primavaira. Quai ha la SGO gia communitgà avant in temp. Il pli cler Na è vegnì dal suveran da la vischnanca da Zuoz, là aveva la suprastanza communala recumandà da refusar la cunvegna. Il president communal Romeo Cusini è cuntent da la decisiun.
La populaziun ha confermà nossa decisiun. Ina decisiun che la suprastanza communala n'ha betg tratg a la svelta mabain ponderà a profund.
Cussegl da fundaziun è dischillus dal resultat
D'in resultat che fa studegiar e fetschia er inqual quità, uschia ha commentà Nora Saratz Cazin, la vicepresidenta dal cussegl da fundaziun ch'è purtadra da l'Ospital Engadin'Ota, la decisiun davart il futur da l'ospital.
Uss èsi da guardar vinavant e chattar la meglra soluziun che nus pudain sut questas circumstanzas.
Era per la presidenta da la fundaziun, Selina Nicolay na saja il temp enfin la votaziun betg stà in simpel, cunquai ch'il tema saja fitg emoziunal. Ed era cun il Na na saja anc betg tut cler per il futur.
Cunquai che la fundaziun è la purtadra da l'Ospital Engiadin'Ota a Samedan ha quai era consequenzas severas per l'entir provediment da sanadad en la regiun. Proxim venderdi s'inscuntra il cussegl da fundaziun a sia proxima sesida per decider davart ils proxims pass.
Sustegn per la cunvegna hai dà da la vischnanca da domicil da l'ospital. Samedan ha ditg Gea cun 155 vuschs cunter 51 Na. Questa votaziun era dentant be consultativa, perquai che Samedan decida final pir ils 14 da december a l'urna.
Il «plan B»
Ins haja stuì quintar cun in Na, e perquai hajan ins elavurà in plan da sanaziun, di Selina Nicolay.
Il plan da sanaziun prevesa:
- da serrar l'ospital durant in moratori,
- la Clinica Gut SA surpigliass singulas prestaziuns cun il sustegn da l'ospital chantunal dal Grischun (KSGR),
- la cuntinuaziun da tschertas partiziuns – per exempel da l'assistenza da naschientscha – duvrass ina nova cunvegna,
- transferir centers per persunas attempadas, spitex e posts da cussegliaziun en novas structuras da manaschi, quai vegniss decis en ina votaziun en l'emprim quartal 2026
- vender la participaziun al servetsch da salvament da l'Engiadin'Ota a la Clinica Gut u ad in'autra interpresa
- e transferir las chasas d'ospital e dal persunal en la massa da concurs.
Models da provediment pussaivels
La Clinica Gut ed e l'Ospital chantunal dal Grischun examineschan models alternativs: per exempel da concentrar il provediment staziunar ed in cas d'urgenza da 24/7 en in lieu ed in center ambulant cun permanence en in segund lieu. La finamira è da mantegnair il provediment da basa er en cas da crisa.