Siglir tar il cuntegn

Header

cuntegn

Engiadina Encunter sentenza en il cas Spöl vegn appellà

La procura publica e las Ovras Electricas d’Engiadina han appellà encunter la decisiun da la dretgira regiunala. Quai han ellas confermà sin dumonda dad RTR.

La dretgira regiunala Engiadina Bassa/Val Müstair ha ussa 90 dis temp dad argumentar lur sentenza en scrit. Pir lura decida la procura publica sch’ins recurria encunter la sentenza e tiria quest cas vinavant a la Dretgira chantunala.

Per tge vai?

Ils 19 da settember aveva la dretgira Engiadina Bassa Val Müstair dà enconuschent che l'inculpà en il process dal Spöl vegnia liber e saja innocent. Ella ha decidì tenor il princip «in dubio pro reo» pia en cas da dubis a favur da l'inculpà.

La procura publica aveva renfatschà al manader da construcziun inculpà d’avair cuntrafatg a la lescha per la protecziun da l'aua. El saja responsabel ch’i saja arrivà tissi da PCB en il Spöl durant lavurs da sanaziun il settember 2016.

Tenor la dretgira n'èn ils mussaments da la procura publica dentant betg suffizients. I na saja betg cumprovà ch’il tissi saja sortì en il flum pervi da la malprecauziun dal manader da construcziun.

video
Spöl: Il accusà è vegnì sentenzià innocent – co vai vinavant?
Or da Telesguard dals 19.09.2022.
laschar ir. Durada: 5 minutas 37 Secundas.

Ils dubis da la dretgira vi da l’accusà da la procura publica èn per exempel era quels:

  • Il manader da construcziun haja tant avant sco er suenter l'incap al mir da fermada Punt dal Gall fatg pliras sanaziuns da PCB ed i n'haja mai dà reclamaziuns.
  • Las Ovras electricas d'Engiadina hajan adina surveglià il plazzal da sanaziun e dà glisch verda per las lavurs.
  • Sche la pulvra da tissi saja mitschada e sortida tras ina largia tar in canal da cabels dal plazzal protegì - sco la procura publica pretenda - na saja betg cumprovà a moda nundubitaivla.
  • Plinavant na saja er betg cumprovà, ch'il tissi ch'ins haja chattà en sediments ed en peschs dal Spöl, derivia da l'incap dal 2016. Quai na possia er betg pli vegnir eruì perquai che las datas necessarias manchian.
Pervi da dubis insuperabels acquitescha la dretgira l’inculpà.
Autur: Orlando Zegg president da la dretgira regiunala Engiadina Bassa Val Müstair

Ils advocats da las Ovras electricas d’Engiadina avevan empermess a las medias in statement. Suenter la sentenzia han ils advocats da las ovras dentant bandunà svelt la sala ed han refusà da dar in commentari.

audio
Process Spöl: Claudia Cadruvi metta a lieu la sentenzia
ord Actualitad dals 19.09.2022.
laschar ir. Durada: 4 minutas 52 Secundas.

RTR novitads 15:00

Artitgels legids il pli savens

Scrollar a sanestra Scrollar a dretga