Siglir tar il cuntegn

Header

audio
Las midadas al timun da las vischnancas
Or da Actualitad dals 30.12.2023. Maletg: RTR
laschar ir. Durada: 5 minutas 10 Secundas.
cuntegn

Engiadina Las midadas al timun da las vischnancas

Ils ins sesan vinavant, numnadamain èn quai Fernando Giovanoli da la Val Bregaglia, ed era Daniel Bosshard da la vischnanca da Silvaplauna. Els eran gia presidents communals ed èn vegnids reelegids per ina nova perioda d'uffizi a partir dal 2023. Restada presidenta communala, suenter in cumbat electoral, è era la presidenta da Segl, Barbara Aeschbacher. Els dastgan seser vinavant sin la pultruna al timun da la vischnanca.

Dapi il 2023 maina Aita Zanetti la vischnanca da Scuol, quai suenter che Christian Fanzun da Tarasp aveva chalà.

Jau na vuless betg ina pel dira, uschiglio manca il sensori per quel visavi.
Autur: Aita Zanetti presidenta communala Scuol

In nov vegl president communal ha era la vischnanca da Zernez. Suenter ina pausa politica ha Domenic Toutsch decis da manar anc ina giada la vischnanca da Zernez. El era stà plirs onns president communal avant la fusiun.

Igl è tut pli birocratic ch'avant – ma i dat era bels muments.
Autur: Domenic Toutsch president communal da Zernez

In Appenzellais sco president per Samignun

Daniel Högger viva gia dapi blers onns a Samignun ed ha era adina politisà. Suenter la mort dal president communal Karl Jenal, ha Samignun elegì Högger sco nov president communal il 2023.

A Zuoz è vegnì elegì Romeo Cusini. Zuoz elegia las instanzas communalas a chaschun dal Chalandamarz. Il president communal Andrea Gilli aveva demissiunà ses uffizi anticipadamain e durant intgins mais aveva manà il vicepresident Ramun Ratti la vischnanca.

Mes bul politic vi jau metter sin ils giuvens, las famiglias ed il indigens.
Autur: Romeo Cusini president communal Zuoz

Politicras e politichers che cumenzan l'onn 2024

Pietro Della Cà è vegnì elegì sco president per la vischnanca da Brusio.

Plinavant ha ina giuvna da 36 onns fatg la cursa a Bever. Selina Nicolay è era en il Cussegl grond e dastga surpigliar il presidi communal a partir dal 2024.

RTR actualitad

Artitgels legids il pli savens