Il cussegl communal ha decidì cun 11 cunter 4 vuschs da betg entrar en la discussiun davart surprender bundant 250'000 francs dal deficit da 700'000 francs da la destinaziun turistica Engiadina San Murezzan SA l'onn 2019.
Las fracziuns da la PLD e Next Generation/GdU han pretendì da sclerir l’emprim diversas dumondas en connex cun ils virivaris dals davos mais en la destinaziun turistica avant da decider sche la vischnanca vul surprender sia cumpart dal deficit.
Tranter auter è vegnì crititgà che la maioritad dals acziunaris ha dà distgargia al vegl cussegl administrativ da la destinaziun Engiadina San Murezzan.
Che San Murezzan e Segl han s'abstegnì enstagl da betg dar la distgargia è stà in sbagl.
Vinavant duai vegnir respundì, tge che sto concret anc vegnir lavurà si dal passà, sch'i dat reservas per ils cas giuridics pendents ni sch'i ha dà ina incumbensa per il nov cussegl administrativ d'emprim sanar la ESTM SA. Questas ed ulteriuras dumondas èn vegnidas inoltradas sco interpellaziun.
Proxima sesida ils 11 da zercladur
La suprastanza da San Murezzan sto uss damai respunder las dumondas enfin la proxima sesida dal parlament da San Murezzan ils 11 da zercladur. Sin basa da questas vegn il cussegl lura a decider sche la vischnanca da San Murezzan duai surprender ils bundant 250'000 francs dal deficit da la destinaziun turistica.
Betg mo tema a San Murezzan
La dumonda da surprender ina part dal deficit da 700'000 francs ston actualmain tut las vischnancas da la Regiun Malögia respunder. 9 da 12 vischnancas han entant decidì, averta è la dumonda dasper San Murezzan anc a Madulain ed a Bregaglia.
Set vischnancas han decidì da vulair sustegnair la destinaziun, dus da betg pajar: S-chanf e Samedan. S-chanf è dentant avert da discutar anc ina giada en chaussa. Samedan percunter è da l'avis ch'ina organisaziun cun in preventiv da 10 milliuns francs sto esser buna dad egualisar il tal sez.
La dumonda chaschuna per discussiuns
Quai mussa che be paucas vischnancas han decidì da pajar senza cundiziuns. Uschia ha Segl decidì da sustegnair la destinaziun mo sut la cundiziun, che tut las vischnancas dian gea. E Schlarigna dovra il consentiment da la radunanza communala.
Il tema vegn damai a procurar per discussiuns era a la proxima conferenza da presidents da la Regiun Malögia ch'ha era lieu ils 11 da zercladur.
Da surprender il deficit da 700'000 francs è stada ina proposta da la gruppa da lavur da la conferenza da presidents da la Regiun Malögia. Cun ina charta ha la direcziun da la destinaziun silsuenter dumandà uffizialmain l’acziunariat da surprender il deficit. L’import da 700'000 francs vegn partì si tenor la clav da repartiziun regiunala sin tut las vischnancas da la Regiun Malögia.
