Il cussegl d'administraziun da l'Engiadina Turissem SA ha elegì Sereina Jost sco terza commembra da la direcziun. Sco quai che l'organisaziun scriva en ina communicaziun, è Jost responsabla en il futur per il sectur «marca ed innovaziun». Ella cumenza sia lavur il 1. da mars. Sereina Jost ha 32 onns, è oriunda da Sargans ed abitescha actualmain a San Murezzan. En differentas funcziuns ha Jost lavurà durant plirs onns per l'organisaziun turistica Heidiland Tourismus a Bogn Ragaz. La direcziun da l'Engiadina Turissem SA vegn manada da Jan Steiner. Era commember da la direcziun è Thomas Rechberger.
Nov model d'organisaziun
Davent dal 1. da favrer cumenza l'organisaziun turistica da l'Engiadin'Ota a lavurar cun ses nov model d'organisaziun. Las incumbensas internas èn vegnidas adattadas. Da nov vegni a dar quatter partiziuns da manaschi. Las ierarchias aifer il manaschi daventan pli gulivas, las squadras duain lavurar a moda interdisciplinara. Quest nov model d'organisaziun duai gidar a resguardar meglier ils basegns dals giasts, ma era da la populaziun e da la politica, scriva l'Engiadina Turissem SA.
Il cussegl administrativ da l'Engiadina Turissem SA aveva decis gia la stad passada che l'organisaziun duai survegnir ina co-direcziun enstagl d'in CEO. En pli aveva il cussegl administrativ definì da lez temp accents per la lavur futura. Tranter auter che la transfurmaziun digitala duai cuntinuar.
