Festivitads 1. d'avust - Gerhard Schröder a San Murezzan e glatschs a Cuira - Novitads

Gerhard Schröder, l’anteriur chancelier da la Germania tegna a San Murezzan il pled dal 1. d’avust. La festa naziunala ch'era atgnamain planisada en il Kulm Park ha stuì vegnir dischlocada pervi da l’aura en il Hotel Reine Victoria a San Murezzan Bogn. Ils osps da la festa èn però tuttina illusters. Surtut la visita da l’anteriur chancelier da la Germania Gerhard Schröder e da l’anteriur cusseglier federal Christoph Blocher stattan en il center da las festivitads a San Murezzan.

audio

Roman Dobler live da la festa da prim d'avust a San Murezzan

07:07 min, Sport ed actualitad dals 01.08.2021.

laschar ir. Durada: 07:07 minutas.

Gerhard Schröder è stà il setavel chancelier da la Republica Federala Tudestga. El è ensemen cun Willy Brandt e Helmut Schmidt in dals trais chanceliers tudestgs da la partida socialdemocrata SPD. Sia carriera politica ha cumenzà l'entschatta dals onns 1960. Dapi lura è Schröder stà commember da la partida socialdemocratica, da la SPD en Germania. A partir dal 1980 era el part dal parlament da la Republica Federala Tudestga. L’onn 1990 è el vegnì tschernì sco primminister da la Saxonia Bassa. En quella funcziun ha el cumbattì l’onn 1998 per il post dal chancelier. Gerhard Schröder ha gudagnà la tscherna encunter Helmuth Kohl ch'era stà varga 16 onns chancelier.

Lavur sco giurist ed engaschament tar concerns d’energia

Suenter che Gerhard Schröder n’era betg pli vegni tschernì sco chancelier da la Germania l’onn 2005 è el puspè turnà tar sia lavur sco giurist. Dasperas s'engascha el sin basa voluntara per differents projects. Schröder ha dentant era surpiglià differents mandats en cussegls administrativs. Tranter auter ha el surpiglià in engaschament tar l’interpresa Nord Stream AG. Quella interpresa ha construì ina pipeline per il transport da gas da la Russia tras la Mar dal Nord fin en Germania. La Nord Stream AG tutga per 51% al concern d’energia russ, Gazprom. Gerhard Schröder è vegnì crititgà dad auters politichers e da persunas publicas massivamain per quest engaschament.

In glatsch malgrà la malaura a Cuira

Sin il Kornplatz a Cuira è blera glieud sa scuntrada per las festivitads dal prim d’avust. Empè dal fieu artificial ch’è crudà en l’aua pervia da Covid, hai dà in glatsch gratuit offert da la citad. Medemamain hai era dà in program accumpagnant per uffants cun smincar e zambregiar. Arrundà é tut vegnì d’in duo dad orgelets a maun.