Ils plans per las duas chasas eran pronts, ed era cun la permissiun da construcziun pareva tut sin buna via. Dentant eran entrads nov recurs tar la vischnanca da Scuol. Per gronda part da vischins en il quartier a l’ur da la fracziun da Ftan. Blers dals recurrents èn possessurs e possessuras da segundas abitaziuns.
L’architect dal project, Chasper Cadonau, ha crititgà en las medias socialas ils recurrents. Quels vulessan conscientamain evitar la construcziun dad abitaziuns pajablas per indigens.
Planisaziun locala vs. projects da construcziun
Entant è vegnì cler che era la vischnanca da Scuol n’è betg pli stada segira, sch'il project correspunda a las novas leschas da construcziun. Ins sto savair che Scuol è vi da surlavurar la planisaziun locala per tut il territori da la vischnanca, inclusiv las fracziuns dad Ardez, Guarda, Scuol, Sent ed apunto Ftan.
Per elavurar quella ha Scuol stgaffì ina zona da planisaziun gia avant radund otg onns sur tut la vischnanca. Quai dess garantir segirezza da planisaziun per la vischnanca durant las lavurs vi da la planisaziun locala.
Nagin Na ma era nagin Gea
Il rapport preliminar dal chantun Grischun dal 2023 pervi da la planisaziun locala da Scuol ha pretendì che la vischnanca da Scuol duai reducir anc dapli lur zonas da construcziun. Quai era en la fracziun da Ftan.
La vischnanca tema ussa che era las duas parcellas ston vegnir pigliadas ora da la zona da construcziun.
Il project da construcziun na po betg cuntradir a las leschas da construcziun existentas, pero er betg a quellas futuras. Sche las duas parcellas èn lura propi dador la zona da bajegiar a Ftan, cuntraschess ina permissiun da construcziun a la lescha. Uschia ha la vischnanca da Scuol decis – tenor las respostas da la presidenta communala Aita Zanetti sin dumondas da la FMR – da sistir la dumonda da construcziun fin che la planisaziun locala è fatga e sut tetg.
Giavisch da dapli curaschi
Per l'architect Chasper Cadonau è questa decisiun tenor sia resposta sin Facebook ina che chaschuna in retard da plirs onns. El avess giavischà da la vischnanca dapli curaschi cun aderir a la dumonda da construcziun, malgrà recurs e dumondas da la planisaziun locala. Uschia avessan ils patruns da construcziun pudì cumbatter per il project davant la dretgira.
Dubis da la vischnanca da Scuol
Quai dubitescha la presidenta communala Aita Zanetti en sia resposta envers la FMR. Igl ha gia dà cas davant la Dretgira superiura grischuna sco era davant il Tribunal federal. En tuts dus cas eri ì per vischnancas cun zonas da planisaziun ch'avevan dà permissiun da construcziun per parcellas en zonas da bajegiar periferas.
En tuts dus cas han ils derschaders chantunals e federals decis che las vischnancas pertutgadas han da retrair las permissiun. En cas da las duas parcellas pertutgadas en la fracziun da Ftan avess la vischnanca cun gronda probabilitad era stuì retrair ina lubientscha da bajegiar ipotetica.
Bajegiar gea, ma ...
Cun far retschertgas han experts en chaussa era confermà ch'il bajegiar en zonas da planisaziun è spinus. Era sch'in project da bajegiar è confurm a las leschas decida la dretgira cunter tals projects. Sch'i na dettia pero nagin recurs possian ins bajegiar.