Per la fin d'avrigl ha la reverenda Dagmar Bertram desditg sia plazza tar la Corporaziun evangelica Scuol-Tarasp – per motivs privats. Dapi il prim da matg ha surpiglià Helmut Gossler la represchentanza. Perquai ch'el accumplescha proximamain ses 70avel anniversari e perquai ch'i dat ina limita da vegliadetgna per reverendas refurmads en il Grischun, na dastga el betg surpigliar la plazza sco reverenda fix. Fin ch'il consistori ha chattà ina successiun, è l'engaschament da Helmut Gossler limità a dus mais. Quest contract limità po adina puspè vegnir prolungà per ulteriurs dus mais.
Annina Kasper è presidenta da la Corporaziun evangelica Scuol-Tarasp. Ella ha fatg gronds sforzs per chattar in u ina nov reverenda – fin ad interim invan. «Nus avessan persunas interessadas per la plazza, dentant pir per en dus u trais onns e betg per ussa», di ella. Per surmuntar il temp senza reverenda stabel ha il consistori chattà la soluziun cun Helmut Gossler. Annina Kasper è en stretg contact cun la baselgia chantunala. «Nus prolungain il contract fin che nus chattain insatgi adattà.» La situaziun è tut autra che ideala, surtut cunquai che Sent n'ha actualmain era nagin reverenda.
Senza collavuraziun na vai betg pli
Las duas corporaziuns collavuran dapi quest onn per emplenir largias. I dat per exempel predis dubels, saja quai dals reverendas u da la predicatura laica e dals organists. Senza la predicatura laica, Seraina Guler, na fissi betg pussaivel da cuvrir tut il pensum – ni per Sent ni per Scuol, di Barbla Buchli ch'è commembra dal consistori. Dapi 15 onns n'ha Sent nagin president dal consistori, la mesadad da questa perioda è stada vacanta la plazza da reverenda.
A partir da l'avust ha Sent ina persuna da remplazzament cun in pensum da 50%. Fin la primavaira è schliada la situaziun cun il remplazzament. Suenter ston ins guardar vinavant. Tenor Barbla Buchli n'ha la corporaziun da Sent fin ussa betg survegnì bler sustegn da la baselgia chantunala u da la regiun. Sent haja stuì chattar sez soluziuns. Perquai hajan els collavurà per l'instrucziun da confirmands per exempel cun Valsot.
Reverendas pon lavurar en lur atgna moda e maniera
Ha questa situaziun da far insatge cun la regiun perifera che n'è betg interessanta per in reverenda? In sguard sur il Pass dal Fuorn mussa in auter maletg: Chasper Stuppan è dapi passa 30 onns president dal consistori en Val Müstair, l'entschatta mo da Tschierv, lura da tut las plaivs da la Val. Plirs reverendas èn stads engaschads durant ses temp d'uffizi, la gronda part dad els è restada plirs onns. «Jau n'hai mai gì difficultads da chattar in reverenda», di Chasper Stuppan. L'ultima giada ch'el ha scrit ora ina plazza, ha el survegnì tschintg annunzias. Elegida è vegnida Bettina Schönemann.
Impurtant saja da chattar ina persuna che viva gugent en las muntognas e stimia da lavurar independentamain, di il president. Natiralmain na saja la paja en Val Müstair betg uschè auta sco forsa a Turitg e la reverenda stoppia avair quità da tuts, da giuvens e vegls, da sauns e malsauns. «Ma nus laschain lavurar ils plevons en lur moda ed els han bleras cumpetenzas», intunescha Chasper Stuppan.
Igl è ambizius d'occupar plazzas
Lucian Schucan è il president da la raspada evangelica-refurmada da l'Engiadin'Ota. Per il mument na datti naginas difficultads da chattar reverendas en Engiadin'Ota. Fin oz eran tut las plazzas occupadas. Duas persunas han desditg lur plazza e quellas pon puspè vegnir occupadas. Tuttina di il president: «Igl è ina sfida d'occupar plazzas da reverenda.»
L'onn passà ha gì lieu la sinoda en Engiadin'Ota. Bain pussaivel che quella «traglischa» anc in zic, sco Lucian Schucan di. Dapi la fusiun da las plaivs a Refurmo Engiadin'Ota datti ussa per ils reverendas en la regiun la pussaivladad da lavurar en il team e da prender per mauns incumbensas. «Mintgin po surpigliar las spartas che correspundan ad el», declera el. Uschia daventa in post era pli attractiv. Fin che la fusiun ha cumenzà a purtar fritg hai duvrà ditg.
La situaziun precara sco quai ch'i regia actualmain a Scuol e Sent n'è betg unica. La vischnanca da Tumein-Panaduz-Razén ha gì sur in lung temp plazzas betg occupadas. Pir ussa èsi puspè reussì d'engaschar in plevon. Tenor Erika Cahenzli, la presidenta dal cussegl da la Baselgia evangelica refurmada dal Grischun, èsi per blers consistoris ina gronda sfida da chattar in plevon, betg mo en las regiuns perifericas, mabain en general. «Ils lieus muntagnards han schizunt in avantatg», di ella. Raspadas grischunas èn attractivas per plevons che vulan passentar lur davos onns da professiun en las muntognas. Perquai propona il Cussegl da baselgia d'adattar la lescha d'admissiun. La finamira è che plevons possian lavurar cun in contract fix fin a la vegliadetgna da 70 onns.
Investir en novas collavuraziuns
«En il chantun Grischun instradain nus in'autra via», declera la presidenta dal cussegl da baselgia dal Grischun. Il cussegl da baselgia haja elavurà in concept per promover la generaziun giuvna. Qua vegnia mess paisa sin la promoziun da tut ils mastergns da baselgia, er da la catecheta u dal diacon social. «Teams interdisciplinars han potenzial, las incumbensas en la plaiv pon vegnir partidas cun autras gruppas professiunalas», declera Erika Cahenzli. Uschia possia dar champs professiunals attractivs e che fetschian senn. «Nus creain ussa ina nova plazza che s'occupa mo cun talas dumondas», di ella. Cun in agir proactiv spera ella da pudair far frunt a las sfidas futuras.