«En ils servetschs da la Baselgia evangelica refurmada èsi pussaivel da lavurar fin a la vegliadetgna da 70 onns. Perquai sun jau ma dumandà tge che jau duai far en mes davos set onns da servetsch e sun ma decidì per ina midada», ha ditg ser Christoph Zingg sin dumonda da la FMR. Cun la fin da favrer 2026 – tut tenor gia in pau pli baud causa vacanzas – banduna el la plaiv evangelica Cadi. Stgars quatter onns ha el lavurà sisum la Surselva. Christoph Zingg aveva surpiglià l'onn 2021 da ser Roland Just. En la plaiv evangelica Refurmo che cumpiglia trais circuls pastorals, surpiglia el ensemen cun ina collega la responsabladad per Champfèr, Silvaplauna e Segl.
Enavos en l'Engiadina
Christoph Zingg era gia engaschà ils onns 90 durant nov onns professiunalmain en Engiadina: «Là hai jau anc adina fermas ragischs, er culturalas.» Da lez temp ha el pastorà a Bever e lavurà sco spiritual a l'ospital a Samedan. «La schanza da turnar en l'Engiadina è sa dada. Jau na bandun betg la Cadi perquai che jau stuess ir, ma la chaschun da far midada è dada. Per mai è quai ina nova sfida», di Christoph Zingg ed accentuescha: «Jau hai infurmà ad uras las persunas responsablas da la plaiv evangelica Cadi e da la Fundaziun Tür auf – mo vinavon. Uschia resti ussa temp avunda per tschertgar ina successiun per mai.» Sco Christoph Zingg di, è la plazza gia scritta ora ed igl haja gia dà intginas dumondas a bucca. I fiss natiralmain ideal, sch'i gartegiass da chattar ina persuna ch'è era pronta da s'engaschar en la fundaziun Tür auf – mo vinavon, pia betg mo en la plaiv.
Engaschis ordaifer la plaiv èn pussaivels
Christoph Zingg s'engascha en differents gremis da la Baselgia evangelica refurmada da la Svizra. El è tranter auter cunresponsabel per il departament da las relaziuns externas e presidiescha la cumissiun da gestiun. El è medemamain commember da la giunta da la conferenza svizra. Ma era sur ils cunfins da la Svizra s'engascha el per ils interess da la Baselgia evangelica refurmada. «En l'engaschament en Engiadin'Ota poss jau lavurar vinavant en quests gremis. Quests mandats ma fan plaschair», accentuescha Christoph Zingg.
Sin la dumonda tge che vegn a restar ad el il meglier en memoria dal temp en la Cadi di el: «D'ina vart èn quai las localitads da l'Aua Viva a Mustér. Ellas pussibiliteschan las pli differentas pussaivladads da s'inscuntrar, sco cults divins, distribuziun da tschaveras, concerts u exposiziuns.» Christoph Zingg accentuescha ch'el na saja dentant anc betg vi dal prender cumià. Ses engaschament dura anc intgins mais. E sche las confirmandas, ils confirmands e lur geniturs giavischan, saja el er pront da dar la confirmaziun il mars 2026.
A la tschertga da collavuraziuns
Sco il reverenda partent ha era ditg sin dumonda da la FMR, è la plaiv evangelica da la Cadi vi dad evaluar eventualas pussaivladads da cooperaziun cun autras cuminanzas evangelic-refurmadas en Surselva: «Suenter che nus avain gì ina discussiun cun represchentants da quellas vischnancas, avain nus fatg ina dumonda en scrit ad els. Il mument n'ha la plaiv evangelica Cadi nagin basegn explicit da collavurar, ma il temp ch'i dovra po vegnir.» Co ina tala cooperaziun pudess vesair ora, è avert per Christoph Zingg. I dess franc models che purschessan a tut las plaivs da profitar ina da l'autra e da crear uschia ina collavuraziun regiunala. «Nus tschertgain simplamain pussaivladads per collavurar en ina furma u l'autra cun autras plaivs», punctuescha Christoph Zingg. Ils commembers da la plaiv evangelica Cadi hajan dà l'incumbensa a las persunas responsablas da sa mover en questa direcziun.