Sco l'iniziant Gian-Reto Staub ha ditg envers RTR stoppia la halla da glatsch vegnir realisada ubain a San Murezzan ubain vegnir messa ad acta. En quel segn saja el cuntent che San Murezzan haja uss il squitsch da stuair decider sch'ins veglia la halla u betg. Dentant, sche San Murezzan decida da betg metter a disposiziun Ludains saja per el temp da schliar la societad e terminar l'engaschament.
Promulins n'è nagina opziun pli
L'ultim areal en discussiun, l'areal Promulins a Samedan, na stat betg pli a disposiziun. La conferenza da presidents da la Regiun Malögia è vegnida infurmada en chaussa. Sco Christian Brantschen ha declerà, ha Samedan evaluà l'onn passà in'ulteriura giada sche l'areal Promulins na vegniss tuttina betg en dumonda per realisar la halla da glatsch regiunala. Evaluà è vegnì l'areal nua che la plazza da ballape sa chatta. Finalmain avess Samedan dentant stuì sacrifitgar la plazza da ballape per pudair realisar la halla da glatsch. Quai na vul Samedan dentant betg. Perquai è quest areal definitivamain giud maisa.
San Murezzan duai reponderar
Uss vul la cumissiun da planisaziun regiunala da la Regiun Malögia dumandar anc ina giada la suprastanza da San Murezzan, sch'ella na fiss betg pronta da reponderar la decisiun davart l'areal Ludains. La suprastanza communala aveva decidì la primavaira passada, che quel areal na stettia betg a disposiziun per ina halla da glatsch regiunala.
