L'hotel Laudinella a San Murezzan Bogn vegn renovà. Sin la stagiun d'enviern sa preschentan 60 chombras, la sala da concert ed ulteriurs locals da cultura en in nov vestgì. Durant la stagiun, vegnan alura renovadas ulteriuras localitads sco quellas per la tecnica, il housekeeping, biros ed ina nova lobby.
17 milliuns francs
Total vegnan investids var 17 milliuns francs. Che quai capita gist en quest temp intschert saja in’enorma sfida. Andrea Cologna, la directura da l'hotel Laudinella vesa però er ina schanza. Numnadamain hajan ins pudì nizzegiar il temp nua ch’ins ha gì be paucs giasts. Vinavant saja planisà quest project dapi dus onns, pia avant la pandemia.
Sustegn dal Chantun
Per quai che la sala da concert e las localitads da cultura da l'hotel Laudinella èn da grond’impurtanza regiunala sustegnan chantun e Confederaziun quellas renovaziuns cun ina contribuziun da prest in milliun francs.
Sin la stagiun da stad dal 2021 duai esser a fin la renovaziun totala.
