Las localitads culturalas en l'hotel Laudinella a San Murezzan han ina impurtanta funcziun culturala en Engiadin’Ota. Perquai survegn l'hotel in milliun francs subvenziuns per la renovaziun da la sala da concert, dal chantun e da la Confederaziun. Gist ussa en il temp da crisa, causa il coronavirus, ha la Laudinella SA decis da cumenzar cun las renovaziuns e quai oravant tut cun la renovaziun da la sala da concert.
Tenor il manader da fatschenta da l'hotel, Christoph Schlatter, vulan els uschia sa preparar sin la proxima stagiun d’enviern. Sco hotel cun primarmain giasts da l'exteriur, na fa el betg quint cun blers giasts durant la proxima stad. La segunda etappa da renovaziun, numnadamain la renovaziun da 50 chombras, prevesa la Laudinella SA da realisar lura l’onn 2021. La renovaziun totala vegn a custar radund 15 milliuns francs.
