Che quai saja il biro cun il pli bel panorama ch'in directur da scola possia avair, di Jared Nolan a chaschun dal termin d'intervista en ses plaz da lavur. L'anteriur policist da Wales ch'ha era lavurà divers onns sco directur da differentas scolas en tut il mund lavura dapi prest in onn a l'Institut Otalpin Ftan (IOF) sco directur ed ha grondas ambiziuns per la scola media regiunala ed internaziunala: Jared Nolan vul meglierar l'image da lînstitut, augmentar il dumber da scolars, introducir in nov program da furmaziun ed intensivar il contact cun la populaziun locala.
FMR: Dapi l'avust 2024 essas Vus directur da l'Institut Otalpin Ftan. Co ha el cumenzà qua e co è sia bilantscha suenter quel temp?
Jared Nolan: Ils emprims mais ch'jau hai passentà qua èn stads grondius. Gia avant ch'jau hai cumenzà mia lavur qua, hai jau ditg: jau n'hai anc mai vis ina scola cun tant potenzial sco quella. E mia incumbensa è era da realisar quest potenzial. Ma sch'ins discurra da potenzial vul quai adina era dir: i dat anc insatge da far, nus n'essan anc betg là nua che nus vulain esser. Ma jau crai che quai che nus purschain ussa è almain uschè bun sco il sport en autras scolas ch'han ina bler meglra reputaziun.
Tge è stà per Vus la raschun da surpigliar il directori da l'Institut Otalpin Ftan?
Jau sun stà directur da differentas scolas en la Gronda Britannia, en la China, en il Vietnam ed en ils Emirats Arabs Unids. Per part en scolas cun passa 3'000 scolaras e scolars. Ma quai è insatge tut auter, e quai era insatge che m'ha attratg. Mia passiun per la natira è era stada ina raschun, ma en emprima lingia la sfida professiunala. Nus essan stads conscients da las difficultads e las midadas en il manaschi che questa scola ha fatg tras ils ultims onns. Da vegnir qua, emprender ad enconuscher il sistem svizzer, purtar ina perspectiva nova ed innovativa e lavurar vi da l'image che quella scola stuess avair, quai èn stadas las sfidas ch'han fatg quaidas sin questa lavur.
Co vesais Vus la relaziun tranter l'institut e la regiun?
I tutga tar l'ethos da l'institut che la scola è enragischada en la regiun ed è colliada sin plaun internaziunal. Quai è uschia e sto restar uschia. L'IOF na po betg surviver e na po era betg sa sviluppar senza questa colliaziun cun la regiun.
L’IOF sco internat elitar, sco scola privata per ina clientella potenta internaziunala – è quai per Vus ina perspectiva interessanta?
Autras scolas en Svizra fan gia quai. Ed jau hai era lavurà per talas scolas en l'Asia – per organisaziuns grondas ch'han fatg quella offerta. In dals motivs che jau sun ussa qua è che l'Institut Otalpin Ftan n'è betg ina scola uschè elitara. Questa structura sco scola locala ed il medem mument internaziunala è insatge unic, insatge che nus mantegnain en mintga cas.
Avant radund 10 onns avess l’IOF bunamain serrà sias portas pervi da difficultats finanzialas. Be grazia a l'engaschi da differents geniturs ed in credit extraordinari da la vischnanca da Scuol èsi gartegià quella giada da mantegnair la scola. Ma la confidenza en l'institut ha patì ferm da quell'episoda.
Jau poss mo empruvar da far buna lavur e da gudagnar puspè fidanza. A mia glieud di jau adina puspè: Jau na sun betg vegnì mo per curt temp. Jau aveva in bun job en ils Emirats Arabs Unids, cun bunas pajas e bunas cundiziuns. Jau m'hai decis da vegnir qua perquai che quest lieu ha da porscher insatge unic. Ed jau na sun betg qua per dir en dus u trais onns: «Quai èsi stà, mia lavur è fatga, stai bain!» Jau sun vegnì qua per restar pli ditg, per avair success. Ed ils scolasts e las scolastas han cumenzà a percorscher quai. Era els eran l'emprim cun buna raschun sceptics. Ma els han chapì ch'i na sa tracta betg d'ina ulteriura episoda, sco che l'IOF ha vis quai pliras giadas ils ultims onns.
L'ultim onn da gestiun ha dentant chaschunà a l'IOF ina perdita da 2 milliuns francs. Actualmain ha la scola mo circa 90 scolaras e scolars. Quai n'èn betg cifras perdurablas per il manaschi da scola, u?
Tras l’instituziun «Education in Motion» (EIM), l’acziunari da maioritadprincipala, è la situaziun finanziala entant garantida. EIM ha investì bler en il success da l'Institut Otalpin Ftan. Era sche nossas localitads da scola e d'internat n'èn anc betg plainas fa EIM gia quint che nus cuntanschian il cunfin da capacitads ils proxims onns. Perquai avain nus cumprà l'onn passà l'hotel Aurora ad Ardez. Questa investiziun ans dat dapli flexibladad per il svilup da la scola e mussa era la fidanza che la EIM ha en noss avegnir. Nus avain in plan a lunga vista e vulain esser en trais fin tschintg onns ina scola cun var 240 scolaras e scolars. En questa scola regia ussa in vair sentiment da segirezza sco quai ch'igl n'era forsa anc betg uschè bler ils ultims onns. E quai pussibilitescha a nus er d’investir e dad engaschar persunal bain qualifitgà.
Avais Vus l’impressun che quest sentiment da segirezza, quest optimissem saja gia avant maun en la regiun? Per exempel tar geniturs che ston sa decider sch'els vulan trametter lur uffants en l'IOF u en in'auter gimnasi?
Sper mesiras «diras» sco garanzias finanzialas ed investiziuns, dovri segir signals pli «loms». Sco ditg, il potenzial da questa scola e da questa regiun è fitg grond, e quai stuain nus uss chapir. Sch'ils uffants ans raquintan da lecziuns interessantas, sche nossas scolaras e noss scolars internaziunals turnan a Schanghai e raquintan da las meglras emnas da lur vita, sch'ils resultats d'examen èn buns, lura pudain nus meglierar plaun a plaun nossa reputaziun. Ma nus vulain ussa era crear dapli transparenza e tschertgain activamain il contact cun la populaziun en la regiun.
Co faschais Vus quai?
In exempel èn ils concerts publics che nus organisain ussa regularmain en l'aula da l'IOF. Nus vulain dentant era organisar occurrenzas da sport ed in di da las portas avertas. L'idea è en sasez d'integrar pli fitg la populaziun regiunala, da porscher la pussaivladad da dar in sguard en nossa scola e da vesair sez tge che nus faschain qua. Propaganda da bucca è adina la meglra mesira. Quest enviern hai jau passentà mes dis da skis bunamain dapli cun raquintar a la glieud en la sutga da mia lavur e nossas intenziuns per l'IOF che sin la pista.
Tge raquintais a quellas e quels che han mirveglias co ch'il futur da l'Institut Otalpin Ftan vesa ora? Tge èn ils proxims pass per che la scola haja puspè success?
Nus lavurain actualmain londervi d'augmentar il dumber da magisters per set u otg plazzas. Ed a partir dal proxim onn da scola vulain nus porscher in nov program da furmaziun cun in diplom internaziunal. Igl è in program sviluppà dad EIM che metta gronda paisa sin las differents engaschaments ch'ils uffants fan en differents secturs: engaschaments per l'ambient, en il sport e per surprender responsabladad. Quest program vegn ad esser ina nova purschida sut il tetg da l'IOF, sper la matura «ignite» – il program da barat tranter las scolas dad EIM – e natiralmain l'academia da sport che vegnan ad esser purschidas impurtantas er en l'avegnir. Nus essan persvadids: ina scola prosperanta, che gira bain ed ha ina buna reputaziun – quai è er in factur impurtant per il svilup da la regiun. I fa ina differenza sche la glieud sto sa decider sch'ella vul sa domiciliar qua u betg.
La finala anc ina dumonda persunala: l'emprimavais lavurà sco policist a Wales. Pertge avais Vus midà en la pedagogia?
Jau hai lavurà plirs onns sco policist en la protecziun d'uffants. Jau hai studegià psicologia d'uffants e forensica, hai interrogà uffants traumatisads e creschids ch'èn daventads delinquents cunter uffants. Quai è ina lavur impurtanta che m'ha gidà da chapir meglier ils uffants: cura ch'els èn cuntents, tge ch'els dovran per sa sviluppar bain. Suenter 13 onns tar la polizia n'hai jau betg tschertgà ina pussaivladad d'utilisar questas abilitads a moda pli productiva. La pedagogia porscha questa pussaivladad.