Las plumpas restan a chasa - Nagin Chalandamarz en Engiadina, Val Müstair sco era Lai - Novitads

Las plumpas restan a chasa Nagin Chalandamarz en Engiadina, Val Müstair sco era Lai

Suenter l’Engiadin’Ota uss l'entira vallada: Era las vischnancas da l'Engiadina Bassa, Val Müstair e la Bregaglia han decidì da stritgar il Chalandamarz quest onn. Stritgà è era il Chalandamarz da questa dumengia dals scolars da Lai, Valbella e Vaz.

Autur: Selina Camichel

Quest onn daventa il Chalandamarz unfrenda dal coronavirus. Suenter l'Engiadina, la Val Müstair e la Bregaglia, na datti uss er a Lai nagina festa da Chalandamarz. Sco il manader da la scola da Vaz Martin Langenegger ha ditg sin dumonda da RTR, na lubeschia il chantun betg l'occurrenza.

Il venderdi han er ils presidents da las vischnancas da l’Engiadina Bassa e Val Müstair decidì da stritgar il Chalandamarz. Ed er en la Bregaglia han las autoritads ditg giu il Chalandamarz per quest onn.

audio

Nagin Chalandamarz en Engiadina Bassa e Val Müstair

ord Actualitad dals 28.02.2020.

laschar ir. Durada: 2 minutas 24 Secundas.

Gia la gievgia saira han las vischnancas da l'Engiadin'Ota decis da desister dal eveniment, sco il president communal da Zuoz Andrea Gilli ha confermà envers RTR.

audio

Dischilusiun

ord Actualitad dals 28.02.2020. Maletg: Anna Caprez RTR

laschar ir. Durada: 2 minutas 40 Secundas.

Il cusseglier guvernativ Peter Peyer aveva cusseglià da desister d'occurrenzas publicas, nua ch’i vegnia spetgà fullas da glieud, tranter auter blers turists.