Il chantun veglia evitar tant sco pussaivel ch'il virus da Corona sa derasa vinavant, ha argumentà il cusseglier guvernativ Peter Peyer la gievgia davant las medias. Perquai sajan occurrenzas surregiunalas scumandadas en las regiuns Malögia, Bernina, Engiadina, Val Müstair e Mesauc – quai fin e cun ils 8 da mars 2020.
Perquai n'è betg mo il maraton dals 8 da mars annullà, mabain era las singulas cursas l'emna avant.
«Dischillus ma chapibel»
Tge che l’annullaziun dal maraton muntia per ils participants ed era finanzialmain na saja anc betg cler, ha ditg Christian Gartmann, il pledader dal Maraton.
L’existenza dal maraton n’è betg en privel.
Ils organisaturs dal maraton èn dischillus, ma chapeschan la decisiun dal chantun d'annular l'occurenza. Els hajan planisà dus scenaris ed adina sperà ch'i saja pussaivel d'organisar tenor plan il classicher da passlung.
La sanadad da tut ils involvids è il pli impurtanta.
Igl è la segunda giada ch'il Maraton da skis engiadinais vegn annullà. Il 1991 era el vegnì stritgà pervi da l'aura. Quest onn fiss stada la 52avla ediziun da la cursa populara.
RTR novitads 16:00
