Siglir tar il cuntegn

Header

cuntegn

Lavinas Duas persunas moran en lavina en Val Zuort

Mardi èn pliras persunas vegnidas en lavinas al Piz Zuort a Scuol ed al Piz Daint a Tschierv. Al Piz Daint han ulteriurs commembers da la gruppa pudì liberar ils sutterrads. Als Piz Zuort èn duas persunas mortas.

Ina gruppa dad otg persunas è stada da viadi il mardi suentermezdi a Tschierv per ir direcziun Piz Daint. A las 11:40 è il pèr ch'era il pli davos da la gruppa vegnì en la lavina, scriva la Polizia chantunala en ses rapport. Las ulteriuras sis persunas han pudì deliberar il pèr. In'equipa da la Rega è vegnida sustegnida entras Heli Bernina sco er in spezialist da salvament cun helicopter ed han sgulà en l'ospital Samedan las duas persunas blessadas.

Siglientada necessaria

purtret dal culm ed ins vesa fitg bain nua che la lavina è vegnida giu.
Legenda: La lavina al Piz Zuort. Spezialist da salvament cun helicopter

Il suentermezdi a las 14:10 ha la Polizia chantunala survegnì l'annunzia che duas persunas sajan vegnidas sutterradas d'ina lavina. Las persunas da 18 e 52 onns eran da viadi sin il Piz Zuort cura che la lavina saja vegnida libra tranter els dus e la terza persuna che gieva davant els. Ils dus umens èn vegnids stgarpads cun radund 600 meters da la naiv. Cun sgular suravi hajan ins lura pudì localisar in dals dus umens.

Per pudair salvar las duas persunas ha sco emprim stuì vegnir siglientadas ulteriuras lavinas cun agid da la Heli Bernina. Il salvament dals dus umens è lura vegnì fatg entras duas equipas da la Rega cun agid da commembers da la secziun dal CAS da l'Engiadina Bassa e Bernina. Tranter quels era spezialists dal salvament cun helicopters RSH.

Privel da lavinas actual

Sco l'Institut da naiv e lavinas a Tavau SLF scriva, vegnia il privel il pli grond da las rimnadas da naiv veglia e nova. Er sportistas e sportists singuls possian gia effectuar local lavinas. Perquai saja l'experientscha fitg impurtanta per giuditgar il privel da lavinas.

Carta dal privel da lavinas
Legenda: SLF
audio
Per tadlar: las novitads da las 12:00
ord RTR Audio dals 24.02.2022.
laschar ir. Durada: 2 minutas 54 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga