Ina gruppa da turas dad 8 persunas da Bulsaun è partida sonda bun'ura da Plaun dals Bovs al Pass dal Fuorn, per ir fin sin il Piz Daint sin 2'967 meters sur mar. Per puspè ir engiu èn trais persunas da la gruppa entradas en la flanca dal nord. Suenter curt temp è lura ina lavina vegnida libra sur la gruppa ed ha tschiffà in dals participants. La persuna che ha purtà in detectur da victimas da lavinas, è vegnida stgarpada cun radund 400 meters e cuvrida.
Ses collegas al lieu han lura immediat tschertgà el e dà emprim agid enfin che la Rega è arrivada, sco er in helicopter da Heli Bernina cun persunal d'agid e spezialists. La persuna blessada è vegnida transportada en l'Ospital chantunal a Cuira nua ch'ella è lura morta dumengia vi da sias grevas blessuras. La Polizia chantunala investighescha en chaussa.
Privel da lavinas considerabel
Per il mument regia en pliras regiuns dal Grischun in privel da lavinas considerabel. Tenor l'Institut da naiv e lavinas a Tavau, duess ins per il mument be far turas sch'ins ha gronda experientscha e cun gronda resalva e precauziun.
