Suenter feminil e bestial era il tema dals terzs dis da litteratura rumantscha en la Fundaziun Nairs a Scuol neolatin. Al cumenzament steva l'idea da la parentella, or da quell'idea è naschida la parentella linguistica, quinta la co-organisatura Bettina Vital.
Nus avain lura decidì dad avrir l'orizont ed envidar auturas ed auturs per vegnir a far visitas a nus qua a Nairs.
Ed uschia ha ella tschertgà ensemen cun Flurina Badel auturas ed auturs, poetessas e poets rumantschs che sajan stads averts per in barat litterar. Sisum lur glista da giavischs steva la poetessa putera Jessica Zuan che viva dapi 15 onns a Barcelona. Ella haja giavischà sez ses tandem, numnadamain Pol Guasch, poet catalan.
Jau enconuscheva ses texts ed igl è fitg interessant tge ch'el scriva. Jau vuleva vegnir a savair dapli da ses texts, co el scriva ed er il context co ses texts naschan.
Ed uschia hajan els s'inscuntrads, hajan mangià ensemen ed emprendì d'enconuscher in l'auter. Or da quest barat han els sviluppà lur prelecziun sin il palc en la Fundaziun Nairs. Suenter in discurs davart la colur da lur lingua, lur inspiraziun e context da lur scriver ed insumma la litteratura neolatina han tuts dus prelegì tschintg da lur poesias.
Els han cunquai avert la porta per ils ulteriurs barats litterars da las poetessas e poets neolatins. Dasper las prelecziuns hai dà durant la fin d'emna in referat da Rico Valär, discussiuns al podium ed ina performance multimediala sin basa da las poesias.