Luca Tavasci da Samedan è passlunghist professiunal en il parasport e stat davant ses terz paralimpics. Sin l’aventura en l’Italia sa legra el fitg – er perquai che las cursas en la Val di Fiemme n'èn betg dalunsch davent da sia patria, l’Engiadina.
Da nov er biatlet
Sper il passlung, ha Luca Tavasci cumenzà questa stagiun cun il sport da biatlon. Mentalmain haja el duvrà insatge nov, e cun quai che per il biatlon haja el sco passlunghist ina buna basa, saja el sa decis per quest sport. Gia en sia emprima stagiun è el sa qualifitgà per ils paralimpics.
Il biatlon ma dat nova motivaziun e ma fa plaschair.
La finamira per quests gieus è cleramain ina rangaziun en ils top diesch. Saja quai tar las cursas da biatlon, ma er tar quellas da passlung. Mo per pauc n'ha el betg cuntanschì quai tar sias emprimas participaziuns ils onns 2018 e 2022.
Sustegn dad anteriura biatleta
Luca Tavasci collavura dapi var 10 onns cun la squadra tudestga e po trenar ensemen cun els. Dasper il sport lavura el er sco inschignier en Engiadina. Dapi intgins mais po el profitar dal sustegn dad Irene Cadurisch, ch'è sa retratga dacurt dal sport professiunal. Per ella è la vart sco trenadra ma er il parasport insatge nov.
Jau na saveva betg co els lavuran. Ma nus ans avain chattà. Luca ha mussà bler a mai ed uss poss jau mussar bler ad el.
Per ses terz paralimpics è l’Engiadinais pront. Irene Cadurisch è persvasa ch’i dat dapli che in top diesch, ella quinta cun in diplom.