D'uffant ha Luca Tavasci passentà bler temp sin il bain puril da ses tat. Il sport n'era alura anc betg uschè preschent en sia vita. Quai è sa midà cura che Luca Tavasci ha cumenzà il gimnasi. En sia classa faschevan blers sport. Il giuven Luca era savens il davos. E quai na vuleva el betg acceptar. Uschia ha el cumenzà da trenar. L’emprim sin il velo e pli tard alura per betg perder la furma durant ils mais d’enviern sin ils skis da passlung. Ils emprims pass sin las lattas stretgas èn stads per el sco in nausch siemi. Vi e pli ha quai dentant cumenzà dad ir meglier, Tavasci ha survegnì plaschair vi dal sport. Ozendi è el l’unic passlunghist da la federaziun Swiss Paralimpic.
Meglra stagiun insumma
Suenter divers onns en la cuppa mundiala da para passlung po Luca Tavasci guardar enavos sin sia meglra stagiun. El ha cuntanschì plazzas da top diesch en la cuppa mundiala da para passlung e tar ils campiunadis mundials ch'èn stads quest enviern ad Östersund en Svezia. Ils buns resultats da quest enviern sa basan sin sia buna furma, sin ils buns trenaments, sin l’experientscha che Luca Tavasci ha entant en quest sport e sin in model da lavur flexibel.
Per mai èsi impurtant da reducir adina pli ferm il temp che manca sin il podest
Diminuir il pensum da lavur durant l’enviern e l'augmentar la stad
Luca Tavasci è inschigner da construcziun tar ina fatschenta a San Murezzan. Ses patrun lubescha ad el da lavurar ils mais da stad quasi cumplain e da reducir ses pensum durant l’enviern – durant la stagiun da trenament e da cursas. Quest model ha Luca Tavasci gia applitgà avant ils Paralimpics da Beijing. Ed uss ha el anc intensivà questa maniera da lavurar. Ed il model da la lavur flexibel dat raschun al passlunghist da Samedan. Anc mai ha el gì ina uschè buna stagiun sco la davosa.
Mia gronda finamira è dad esser pront per ils Paralimpics a Milano 2026 e da far ina medaglia
