Luca Tavasci ha 28 onns, ed è turnà avant diesch dis da ses segunds gieus paralimpics. Il passlunghist turna cun ina bulscha plain bellas regurdientschas, sentiments positivs e surtut cun bunas prestaziuns. En la China ha el fatg trais cursas. Resultadas èn las plazzas 11, 13 e 16. Cun quests resultats è el fitg cuntent.
In diplom fiss stà il siemi da Luca Tavasci, ed avess era dà in stumpel vers l’esser sportist da professiun e forsa gidà a chattar in sponsur. Tut ils atlets rangads avant el treneschan e vivan sco profis – el è en Svizra l’unic atlet che fa passlung ed ha perquai era adina da cumbatter e da s'organisar sasez.
Sforz spezial per ina stagiun speziala
Viver dal esser parasportist n'è betg pussaivel en Svizra – perquai lavura Luca Tavasci era anc sco inschigner da fabrica. Quest enviern ha el però pudì deditgar per l’emprima giada cumplettamain al sport da passlung. El ha fatg in congedi da trais mais – cun la finamira da sa preparar e focusar optimalmain per questa stagiun da cursas, cun in campiunadi mundial il schaner a Lillehammer ed ils gieus paralimpics a Peking.
Per Luca Tavasci èn quests gieus paralimpics stads ils segunds gieus. E suenter ils gieus è avant ils gieus – l’onn 2026 han ils gieus paralimpics lieu prest avant porta a Milano e Cortina d'Ampezzo. El giavischa natiralmain dad esser da la partida e sa metta gia ussa vi da la planisaziun.
