Ils 14avels gieus paralimpics d'enviern en l'Italia èn uffizialmain a fin. Il president Andrew Parsons dal Comité internaziunal paralimpic (IPC) ha declerà la fin dals gieus en il stadion da curling a Cortina d'Ampezzo. La Svizra va a chasa cun ina bilantscha excellenta. Sis medaglias – mintgamai duas giadas aur, argient e bronz, sco era trais diploms han manà als gieus d'enviern cun ils pli gronds success dapi passa 20 onns. Gist quatter da las sis medaglias ha gudagnà il skiunz Robin Cuche. Plinavant han er ils snowboardists Arno Fahrni e Fabrice von Grünigen gudagnà duas medaglias. En la survista da las medaglias è la Svizra sin plazza 14.
En tut hai dà 79 decisiuns da medaglias. Ils atlets e las atletas èn sa mesirads en las disciplinas para ski alpin, para biatlon, para passlung, para hockey, para snowboard e curling en la sutga cun rodas. Las cumpetiziuns han gì lieu a Cortina, a Tofane, a Milaun, ed a Tesero en la Val di Fiemme. La Svizra è stada represchentada en quatter da las sis disciplinas. Dals nov atlets svizzers han tschintg fatg part per l'emprima giada a gieus paralimpics.
La survista da tut ils resultats:
Themen in diesem Newsticker
- Robin Cuche gudagna bronz e Luca Tavasci fa 17avel plaz
- Fabrice von Grünigen e Robin Cuche fan argient
- Paralimpics: Tavasci e Cuche crodan ora
- Robin Cuche gudogna era il super-G a Cortina
- Fahrni va per bronz en il snowboardcross paralimpic
- Paralimpics: Grischun Luca Tavasci vegn 17avel il biatlon
- Aur: Robin Cuche gudogna la cursa rapida
- Ceremonia d'avertura: ils Paralimpics han cumenzà
Finamira svizra surpassada: almain trais medaglias
La finamira dals gieus paralimpics è stada clera tenor Tom Reulein che ha manà la delegaziun svizra a Milano Cortina 2026: Prestar megliers resultats che avant quatter onns a Peking 2022. Là ha numnadamain mo Théo Gmür gudagnà ina medaglia da bronz per la Svizra. «Trais medaglias èn la finamira. Nus avain gì bleras plazzas da podest en la cuppa mundiala questa stagiun ed i giascha naturalmain en la DNA dal sport d’elita ch’ins vul prestar buns resultats», quai ha manegià Reulein. Questa finamira han ils atlets svizzers surpassà per il dubel. Be il skiunz Robin Cuche è gia ì cun quatter da las sis medaglias.
Luca Tavasci è stà en acziun a Tesero
Era da la partida è stà l'Engiadinais Luca Tavasci. L'um da Samedan è naschì cun il maun dretg che n’è betg sviluppà, uschia scriva Swiss Paralympic. L’onn 2016 s’ha el per l’emprima giada participà a la cuppa mundiala. Dal 2018 era el da la partida als gieus paralimpics a Pyeongchang e dal 2022 a Peking. Quest onn en l’Italia è el puspè stà a la partenza tar las cursas da passlung, e per l'emprima giada a las cumpetiziuns da biatlon a Tesero. Per ina medaglia n'hai dentant betg tanschì.
