Avair success durant chatscha e far preda è savens ina sfida per chatschadras e chatschaders. Chattar suenter avair fatg butin in bun lieu per laschar elavurar l'animal po, tut tenor regiun, era esser ina sfida. Uschia era en Val Müstair. Fin avant quatter onns eran las capacitads limitadas. Il mazler lavurava en in local stretg ed improvisà. Pervi da mancanza da capacitad han divers chatschaders purtà lur butin fin en Engiadina u han fatg sez meztga a chasa. Ed era per ils purs da la regiun na cuntentava la purschida betg da far meztga e d'elavurar la charn en la Val Müstair.
En il rom dad in project per il svilup regiunal è vegnì fabritgà la mazlaria il 2021. Possessura da la mazlaria è la societad Bacharia Jaura, che sa furma da 27 purs da la Val Müstair, l’UNESCO Biosfera e la societad da chatschaders Turettas. Il mazler è fittadin. In concept che persvada enfin uss.
Che jau na sun betg possessur da la mazlaria ha plitost avantags. Jau na sun betg lià per adina vi da quest, ed il squitsch è main grond cun quai che jau n'hai betg stuì investir tut privat.
