Cunquai ch'igl è a Tschlin per la pli gronda part magari stip, vegniva recumandà d'engaschar in «guardia balla» sin il percurs da minigolf, pia insatgi che tschiffa si quellas ballas che siglian or da la pista e rodlan da la fora giu. L'in u l'auter vegn bain ad avair stuì siglir tras las giassas salaschadas, suenter a quella balla blaua, sch'ins n'ha betg tutgà accuratamain la ballina cun il bastun da golf e mess ella directamain en viadi sin ina ruta betg intenziunada.
Var 200 annunzias hai dà per l'emprim «festival da minigolf» a Tschlin. «Nus avain gruppas cun glieud or da la vischnanca», di Curdin Tones, «ma er annunzias da glieud da la Val Müstair, da Samignun, dal Tirol dal Sid, perfin da Losanna e Turitg». Cun sia societad «Somalgors 74» ha el inizià ed organisà l’occurrenza che duai avair lieu en il futur mintg'onn. «L’onn passà avevan nus empruvà ora questa idea en in rom pli pitschen cun var 35 participantas e participants. Quella giada eran tuts uschè entusiastics che nus avain decis da far a Tschlin mintg'onn in festival da minigolf durant dus dis.
-
Bild 1 von 3. Sche la vischnanca daventa in parc da minigolf, pon ins era pender si tavlas nunusitadas. Bildquelle: FMR.
-
Bild 2 von 3. Al post «Casino Tablà» sto la ballina svanir tras ina fora en la porta-clavà. Bildquelle: FMR.
-
Bild 3 von 3. Bildquelle: FMR.
Il dinosaur, la rapida e la giassa da desperaziun
Per l'emprima ediziun dal festival han ins mess en funcziun ils ultims quatter dis 12 pistas da minigolf construidas e tituladas cun blera premura e creativitad: Sin «La rapida» ston ins far rudlar la balla giu d’in vegl tractor da Rapid en ina brenta.
-
Bild 1 von 3. La pista «La rapida» . Bildquelle: FMR/ Michael Steiner.
-
Bild 2 von 3. «Sitz des Sensemanns». Bildquelle: FMR/ Michael Steiner.
-
Bild 3 von 3. Bildquelle: FMR/ Michael Steiner.
Al «Der Sitz des Sensenmanns» chatt'ins la fora en in crap per mular la fautsch. En la «Giassa da desperaziun» ston ins pitgar la balla si d’ina giassa fitg stretga, leventond era gist anc in bel pugn pulvra e glera. Cun «Dinosaur dad Ueli» lasch'ins rudlar la balla tras ina sculptura che sumeglia in skelet da dinosaurs, creada or da fessels da lain ch'in tschert Ueli ha laschà enavos avant in pèr onns en ina porta-clavà a Tschlin. E tar «Casino tablà» pitg'ins la balla sur in’aissa e tras ina fora en la paraid d’ina porta-clavà – per lura spetgar mirveglius or da tgenina da las trais foras sutvart ch’ella vegn lura puspè a rudlar ora.
Ina nova perspectiva sin la vischnanca
»Bindel adesiv, struvas, corda e colur – quai è tut quai che nus avain cumprà per construir las pistas», di Thomas Stüssi. El e Benjamin Fritz, omadus artists da l’Appenzell, han construì las pistas da minigolf: «Tut il rest dals materials utilisads avain nus chattà en las stallas ed en ils ierts da la vischnanca.»
-
Bild 1 von 2. Thomas Stüssi e Benjamin Fritz. Els han construì las 12 pistas da minigolf. Bildquelle: FMR/ Michael Steiner.
-
Bild 2 von 2. Curdin Tones è l'iniziant dal festival da minigolf a Tschlin. Bildquelle: FMR/ Michael Steiner.
Or d’in uder han els zambregià la banda d’ina pista. A brentas, sadellas, butschins per l'aua da plievgia han ins dà ina nova funcziun sco foras da minigolf. Tras chinettas, chanals da tetg e sur aissas han els fatg rudlar las ballas en quellas foras. «Sch'ins auda la glieud a giubilar giugond noss percurs, lura è quai in grond plaschair per nus», di Thomas Stüssi. «Jau crai ch'els han propi gì gust.»
El raquinta ch'insatgi aveva constatà l'onn passà, cura ch'els avevan empruvà ora l'idea per l'emprima giada: «Tge legher, quai pon ins propi far dapertut.» E che quai saja precis l'intenziun, di el: «Da dar ina nova idea tge ch'ins pudess far cun tut quai ch'ans circumdescha, da porscher ina nova perspectiva sin noss conturns. Art vul era dir: emprender d'enconuscher insatge, far daventar visibel insatge. E quai è ina moda allegraivla e ligera da sa deditgar a quell'idea.»