La fin da l’onn passà avevan las votantas ed ils votants da l’Engiadin’Ota vuschà cunter il salvament da la fundaziun da sanadad Engiadin’Ota, la SGO. Per evitar che l’ospital a Samedan stuess vegnir serrà la fin da mars han 10 da 11 vischnancas da la regiun decidì da fundar ina nova organisaziun purtadra dal provediment da sanadad, la Sanadura, e da laschar ir la SGO en la procedura da falliment.
Entaifer trais mais han ins realisà questa nova organisaziun ed il prim d'avrigl ha surpiglià la Sanadura sia funcziun operativa. Ils responsabels han tratg ina bilantscha positiva. Segund il president dal cussegl administrativ da l'ospital, Markus Furrer, haja tut funcziunà en bun'ura, ils badges per entrar en chasa, ils computers per avair access als dossiers dals clients ed il manaschi haja pudì cuntinuar per gronda part normal.
La purschida medicinala è daventada main gronda e main spezialisada. Quai era però cler a tuts. Sch'ins vul spargnar e collavurar cun l'Ospital chantunal e la clinica Gut a San Murezzan dovri midadas. Tenor Markus Furrer pertutgia quai fitg paucs pazients, forsa 10 en in onn, declera el.
Malgrà il salvament dal provediment da sanadad en Engiadin’Ota tras la Sanadura ves’ins grondas sfidas per las duas chasas d’attempads. Sco ch'il president ad interim da la Sanadura, Andrea Fanconi declera, duvrass’ins urgentamain dapli persunal. In auter problem è ch'ins n'ha anc chattà nagin manaschi extern che fiss pront da manar las chasas d’attempads.
Malgrà las grondas sfidas che stattan anc davant porta tiran ils responsabels ina bilantscha positiva tge ch’els èn stads buns da prestar en uschè curt temp. Segund els è reussì il salvament tras la Sanadura.