Open Doors Engadin - Surpraisas durant la renovaziun custan

Durmantà 13 onns è stà l'hotel Scaletta a S-chanf. Uss èn ins vi da far lavurs da renovaziun. E durant che las emprimas lavurs èn stadas londervi, han ins chattà era surpraisas, ch'er il president da la fundaziun Scaletta S-chanf, Herbert Schmid, n’ha betg vesì a vegnir.

E quai è uss ina sfida da la planisaziun ma era èn ils cust s’augmentads.

Veglia chasa, bleras renovaziuns, grondas sfidas

L’hotel amez S-chanf è vegnì construì en il 17avel tschientaner. Dapi quel temp han ins fatg pliras renovaziuns. L’ultima avant radund 40 onns. Quella ultima è la pli cumplitgada e problematica per la renovaziun actuala.

Quai betg be en la planisaziun ma er en las lavurs. Sco per exempel là nua ch'ins ha midà ina veglia sala en chombras e cun quai rut paraids e funds. Per metter ad ir puspè quella sala, vul quai er ils materials corrects.

Impressiuns da la visita en l'hotel Scaletta

Numerus auters exempels existan en tut la chasa. Approximativamain custa quai 1 milliun francs dapli, e quels raps han ins uss da tschertgar. Uschia s’augmentan ils custs da radund 14,5 milliuns sin 15,5 milliuns francs.

Finamira è d’avrir sin la fin da l'onn che vegn

Malgrà questas surpraisas duai l’hotel Scaletta vegnir avert il december dal 2027. Quai pero be, sche la renovaziun accumplescha anc quest onn ina finamira. L’hotel duai esser serrà giu cunter l’aua, uschia ch'ins po cumenzar cun las construcziuns internas durant il proxim enviern.