La Fundaziun per il provediment da sanadad Engiadin'Ota, curt SGO, ha infurmà sur dals emprims pass concrets. Il moratori provisoric, per tudestg «Nachlassstundung», che dura fin la fin da mars, duai crear il temp necessari per realisar in plan da sanaziun.
L'Ospital regiunal vegn insolvent la fin da mars 2026
La finamira è d'evitar ina procedura da concurs. Dapi in'emna è in procuratur independent responsabel per las finanzas da l'ospital regiunal a Samedan. Ils emprims pass èn definids, il plan da sanaziun prevesa che la gestiun da las duas chasas da tgira e la Spitex vegnia transferida en ina nova societad purtadra. La part dal servetsch da salvament duai surpigliar l'ospital chantunal.
Il plan da sanaziun prevesa:
- da serrar l'ospital durant in moratori
- la Clinica Gut SA surpigliass singulas prestaziuns cun il sustegn da l'ospital chantunal dal Grischun (KSGR)
- la cuntinuaziun da tschertas partiziuns – per exempel da l'assistenza da naschientscha – duvrass ina nova cunvegna
- transferir centers per persunas attempadas, spitex e posts da cussegliaziun en novas structuras da manaschi, quai vegniss decis en ina votaziun l'emprim quartal 2026
- vender la participaziun al servetsch da salvament da l'Engiadin'Ota a la Clinica Gut u ad in'autra interpresa
- empruvar d'evitar in concurs
Sco quai che las medias communitgeschan vegn l'ospital regiunal da Samedan manà fin la fin da mars, lura surpiglia l'Ospital chantunal la responsabladad per il provediment da basa en l'Engiadin'Ota.
Durant il temp dal moritori stuess tut funcziunar sco enfin ussa.
La SGO infurmescha la fin da schaner davart ils proxims pass. Suenter duai la populaziun da las 11 vischnancas decider, sch'ella è d'accord cun il plan da sanaziun previs dal provediment da sanadad en Engiadin'Ota.