Il Parc Naziunal Svizzer festivescha quest onn ses 111avel anniversari. 111 onns en missiun per proteger e perscrutar la natira. Dapi questa stad datti anc in’ulteriura spezialitad: Il zercladur 2025 han cumenzà a lavurar dus novs guardians dal parc. Tar quest duo è cun Claudia Gerber l’emprima ina dunna en la squadra da guardias dal Parc Naziunal Svizzer, in team dad otg persunas.
Da vegnir elegida sco ina da 140 persunas ch’èn s’annunziadas per las duas plazzas vacantas en il team da guardias dal parc, saja stà per ella ina gronda fortuna. In pass ch’ella haja stuì far e na s’enricla betg.
Jau m’hai ditg: Sche ti na t’annunzias betg per questa plazza, es ti ina tuppa.
Claudia Gerber è creschida si a Turitg en ina famiglia da purs ed ha studegià inschignera da l’ambient. Ultra da quai ha la dunna da 33 onns fatg in emprendissadi da scrinaria. Ils ultims diesch onns ha la nova guardiana lavurà en differents lieus en l'Engiadina ed en la Val Müstair. Gia adina haja ella gì grond interess vid la flora e fauna, uschia ha ditg Claudia Gerber.
Tut quai che reguarda la flora e fauna m’ha gia adina interessà fitg. Questa passiun, cumbinada cun mias scolaziuns – è premissa ideala per il job da guardiana dal parc.
Ch'ella è l’emprima dunna en in ravugl masculin na vul Claudia Gerber dentant betg suttastritgar pli ferm. Per ella saja quai da valitar sco insatge tut normal.
Ils dus guardians principiants Fadri Schorta e Claudia Gerber survegnan ils proxims mais in’introducziun en lur lavur en il Parc Naziunal Svizzer. Auter che en in job dad otg uras en biro, n’è lur lavur mai a fin. Ed els vegnan er ad esser sco guardians persunas publicas, s’accorschan las duas novas guardias dal parc.