Il sulegl è intensiv, las temperaturas creschan e la naiv lieua uss er sin ils auts. En il Parc Naziunal èn las emprimas sendas da viandar puspè avertas, ed era tar quellas pli en ils auts na vai betg pli ditg. La flora e fauna sa dasda dal sien d’enviern ed er las bestgas vegnan activas.
L’istorgia da success dal tschess barbet
Er l’evla ed il tschess barbet èn uss gist a la fin da lur temp da cuar. Il tschess barbet è dapi 35 onns da chasa en il Parc Naziunal. L’onn 1991 avev’ins numnadamain laschà liber utschels per reintroducir els. Dapi lura vegnan ils tschess barbets observads da las guardias dal parc.
Nus observain ils gnieus – cura ch’els cumenzan a cuar, cura ch’ils pitschens vegnan ora... Tut quai empruvain nus d’observar uschè bain sco pussaivel. I n’è betg simpel, ma nus empruvain.
Actualmain datti tschintg pèrs dal tschess barbet en il territori dal Parc Naziunal Svizzer, la populaziun stat bain ed ha tut quai ch’ella dovra. La populaziun saja fitg stabila, el hajan gì success cun ils tschess barbets, di Andri Cuonz.