Gia per la terza giada ha il passlungist da Samedan Luca Tavasci fatg part als Gieus paralimpics, a las concurrenzas olimpicas per sportistas e sportists cun in handicap corporal u spiertal. Tar ils gieus da Milano e Cortina ha Luca Tavasci fatg las cursas da passlung, e per l'emprima giada er las cursas da biatlon. Tut en tut ha el participà a tschintg cursas. Cumenzà ha il sportist da Samedan cun las cursas da biatlon, lura ha el midà a las cursas da passlung. Perquai ch’el ha fatg part a cursas en duas disciplinas ha quai pretendi blera organisaziun ed ina planisaziun minuziusa.
Gronda differenta tranter profis e sportists semi-professiunals
Ils Gieus paralimpics da Milano e Cortina 2026 eran in grond ed impurtant siemi da Luca Tavasci. Anc mai na ha el pudì far part ad uschè ina gronda occurrenza en l’Europa. Era sch'el ha gi l’experientscha dals Paralympics da Pyeongchang 2018 e da Peking 2022 èn ils gieus en l’Italia dal Nord stà per el anc ina giada insatge pli spezial – las cursas en la Val di Fiemme n'èn betg dalunsch davent da sia patria.
Il passlungist da Samedan ha suttamess bler durant ils ultims mais a questa finamira. El ha investi bler temp en il trenament ed en la preparaziun. Il sportist ch’è naschi senza in maun ha prendì trais mais congedi da la lavur.
La finamira era ina plazza tranter ils megliers diesch
Quella finamira ha Luca Tavasci manchentà. Dentant è el turnà cun in fitg bun sentiment da ses terz Gieus paralimpics. Sco meglier resultat valitescha el la 17avla plazza tar la cursa sur 20 kilometers en il stil liber.
Il biatlon ma dat nova motivaziun e ma fa plaschair.
Sustegn dad anteriura biatleta
Luca Tavasci collavura dapi var 10 onns cun la squadra tudestga e po trenar ensemen cun els. Dasper il sport lavura el er sco inschignier en l'Engiadina. Dapi intgins mais po el profitar dal sustegn dad Irene Cadurisch, ch'è sa retratga da curt dal sport professiunal. Per ella è la vart sco trenadra ma er il parasport insatge nov.
Jau na saveva betg co els lavuran. Ma nus ans avain chattà. Luca ha mussà bler a mai ed uss poss jau mussar bler ad el.