Per reducir il ristg da derasar il coronavirus han pliras scolas en la regiun dal Grischun dal sid e Tavau cumenzà gievgia cun instrucziun a distanza. En ils blers lieus quint'ins returnar en las stanzas da scola l'autra emna, cura che tuts han fatg tests, uschia ha infurmà la taskforce Engiadina.
Per il minister d'educaziun Jon Domenic Parolini èsi prudent che tschertas scolas han tut tenor situaziun epidemiologica decis da far uschia. Prender questa mesira per tuttas scolas en il Grischun na saja dentant betg da giustifitgar. Uschia han bleras autras scolas cumenzà gievgia cun instrucziun da preschientscha.
Ins po schon far tests e pir lura returnar en scola. Ma tge capita dal test enfin che la scola cumenza, lura pon ils uffants puspè s'infectar. Ils labors èn actualmain surchargiads e dovran pli ditg ch'usità d'evaluar ils tests.
Plinavant di Parolini ch'i saja grev da giustifitgar mesiras en lieus nua che la situaziun saja meglra e porscher instrucziun a scola saja anc adina la gronda finamira. En ina situaziun sco l'actuala na possia il chantun betg surpigliar la batgetta, perquai che la situaziun tut tenor regiun saja talmain differenta. Mesiras chantunalas pli severas daventassian be tema sche la situaziun sa pegiurescha en l'entir chantun, uschia Parolini. Uschia po mintga scola en collavuraziun cun l'uffizi da sanadad decider sezza sch'i dovra ulteriuras mesiras. Tar quella pratica vul il chantun er restar vinavant.
Differentas reglas tar vischnancas
Per las differentas scolas e vischnancas valan dentant differentas reglas, uschia cumenzan per exempel Zernez, il Puschlav, u er Puntraschigna, sco planisà. Autras scolas, per exempel San Murezzan, u er Silvaplauna cumenzan cun l'instrucziun a distanza.
